وێستگەی هەڵمی 300 مێگاواتی کارەبای خەبات لەکاتی دەردانی دووکەڵی ژەهراوی. وێنە/964+
10 رۆژ مۆڵەت بۆ وێستگەی هەڵمەکەی خەبات دانراوە
964+
سەعید محەمەد – هەولێر
پاککەرەوەی پاشماوەکانی وێستگەی هەڵمی 300 مێگاواتی کارەبای خەبات لە هەولێر لەکارکەوتووە، بەوهۆیەوە وێستگەکە دووکەڵێکی ژەهراوی دەردەدات و بووەتە جێگەی نیگەرانی خەڵکی قەزاکە و پیسکردنی ژینگەی ناوچەکە.
کوێستان ئەحمەد، قایمقامی قەزای خەبات بە تۆڕی 964ی راگەیاند، نزیکەی سێ مانگە فیلتەری وێستگەی هەڵمی کارەبای خەبات لەکارکەوتووە و دووکەڵی پیس ژینگەی خەباتی شێواندووە.
وتیشی، دوێنی یەکشەممە لیژنەیەکی تایبەت لە قایمقامیەتی خەبات و فەرمانگەی ژینگەی هەولێر سەردانی وێستگەکەیان کرد، مۆڵەتی 10 رۆژ بە وێستگەکە دراوە بۆ چارەسەرکردنی ئەم دووکەڵە پیسە.
وێستگەکە لە ساڵی 2020 بەگەڕخراوە و لەگەڵ پاڵاوگەی كار كە لە تەنیشت وێستگەكەیە بەستراوەتەوە و لە رێگەی نەوتی رەش و گەرمكردنی ئاو وزەی كارەبا بەرهەم دەهێنێت.
ئەردەڵان کاوێز، بەڕێوەبەری بەڕێوەبەرایەتی کارەبای خەبات، بە 964+ی وت، ئەم وێستگەیە وەزارەتی کارەبا سەرپەرشتی “دەکات و پەیوەندی بە ئەوان نییە، “بەڵام راستە ژینگەی ناوچەکەی پیس کردووە.
ئاسۆ شکاک، سەرۆکی رێکخراوی ئاڤیار ژینگەیی بە 964ی راگەیاند، تیمێک لە فەرمانگەی ژینگە سەردانی وێستگە و ناوچەکەی کردووە لەگەڵ لایەنی پەیوەندیدار کۆبووتەوە بۆ چارەسەرکردنی ئەم دووکەڵە.