شەش تیم سەرقاڵی گەڕانن
تەرمی ئەو منداڵەی لە بێخاڵ خنکا بێ سەروشوێنە
+964
ئاکام غەفور-سۆران
دوای نیوەڕۆی ئەمڕۆ مندالێکی تەمەن دوو سا‌ڵ لە بێخاڵ کەوتە ناو ئاو و خنکا، منداڵەکە ناوی “د. گ”ـە و خەڵکی هەولێرە، زیاتر لە دوو کاتژمێرە تەرمەکەی نەدۆزراوەتەوە.
تیمەکانی بەرگریی شارستانی سەرقاڵی گەڕانن بە دوای دۆزینەوەی تەرمی منداڵەکە، بەڵام لە شوێنەکە بەربەست هەیە و گەڕان قورسە، بەرگریی شارستانیش دەلێت، تەرمەکە بچووکە و دۆزینەوەی قورسە.
بەپێی زانیارییەکانی 964 هەر لە سەیرانگای بێخاڵ مانگێک پێش ئێستا لە 7.6.2024 منداڵێکی تەمەن چوار سال کەوتە ئاو و خنکا، بەمەش دوو منداڵ لە ماوەی مانگێک لەو سەیرانگەیەدا خنکاون.
لە شوێنی رووداوەکە، بەڕێوەبەری بەرگریی شارستانیی سۆران، کاروان میراودەلی قسەی بۆ 964 کرد و وتی، منداڵەکە لای باوکی بووە و دوای ئەوەی لە دەستی ئەکەوێتە ئاوەکە، ئاو دەیبات و ناتوانن بیگرنەوە.
دەشڵێت، بە شەش تیم سەرقاڵی گەڕانین بە دوای تەرمی منداڵەکە.
بەڕێوەبەری بەرگریی شارستانیی سۆران باس لەوەش دەکات، تەواوی ئەو کەسانەی ئەمساڵ لە سنوورەکەیاندا خنکاون، لە گەشتیارانن و بە مەبەستی گەشت کردن روویان لە ناوچەکە کردووە.
لە سەرەتای ئەمساڵ لە سنووری ئیدارەی سەربەخۆی سۆران حەوت کەس لە رووبارەکاندا خنکاون، کە پێنچیان منداڵ بوون.
پێداچوونەوە: ئەرسەلان عەبدوڵا
