قرتاوکردنى شەقامى سەرەکى پێنجوێن...وێنە: شارەوانى سلێمانى
لەسەر بودجەى پەرەپێدانى پارێزگاکان
شەقامە سەرەکییەکانى پێنجوێن و ناڵپارێز قیر دەکرێن
964+
وریا فەتاح
دەستکرا بە بەشى دووەمى قیرتاوکردنى شەقامە سەرەکییەکانى قەزاى پێنجوێن و ناحیەى ناڵپارێز، قایمقامیش دەڵێت، کێشەى زۆریان هەیە لە بوارى رێگاوباندا.
شارەوانى سلێمانى بڵاوى کردووەتەوە، قیرتاوکردنەکە لە چوارچێوەى پڕۆژە خزمەتگوزارییەکانى بەڕێوەبەرایەتى گشتیى شارەوانییەکانە و 500 ملیۆن دینارى لەسەر بودجەى پەرەپێدانى هەرێمەکان بۆ دەرچووە و لە ماوەى 180 رۆژدا تەواو دەکرێت.
لەسەر پڕۆژەکە 964 قسەى لەگەڵ زانا رەحمان، قایمقامى پێنجوێن کرد، ئەو وتى،”پڕۆژەکە هى پێرارە و نزیکەى 540 ملیۆن دینارى بۆ دابینکراوە، بەڵام بەهۆى نەبوونى پارەى نەختینە بەش بەش ئیشى لەسەرکراوە و پارە هەندێکى جێبەجێکراوە و ئەمەش بەشى دووەمییەتى”.
پڕۆژەکە لە دەروازەى پێنجوێن و ناڵپارێز جێبەجێ دەکرێت و شەقامى سەرەکییە، بە وتەى زانا رەحمان، لە پێنجوێن کێشەى زۆرى رێگاوبانیان هەیە و رێگاى زۆرینەى گوندەکان قیر نەکراوە.