زانکۆی سلێمانی - وێنە: 964
تەنیا وێنەگرتن ماوە
ئاهەنگی دەرچوونی زانکۆ نەما
964+
دیلان محەمەد جەزا – سلێمانی
زانکۆی سلێمانی بڕیاریدا لە کۆتایی ساڵی خوێندندا تەنیا وێنەی دەرچوون دەگیرێت و رێگە بە هیچ جۆرە ئاهەنگێکی دەرچوون نادرێت.
ئەمڕۆ یەکشەممە 21.4.2024، یۆهان عوسمان، بەرپرسی راگەیاندنی زانکۆی سلێمانی بە 964ـی وت، بە مەبەستی نەهێشتنی جیاوازی چینایەتی رێگە بە هیچ ئاهەنگ و مەراسیمێکی دەرچوونی خوێندکارانی کۆتا قۆناغ نادرێت لە زانکۆدا.
باسی لەوەکرد، ئەمساڵ ئەو بڕیارە دەرچووە و خوێندکاران تەنیا دەتوانن وێنەی کۆتا قۆناغیان بەیەکەوە بگرن و لەوە زیاتر رێگە پێدراو نیە.
ئەوەشی خستەڕو، هۆکاری ئەو بڕیارە دەگەڕێتەوە بۆ دۆخی دارایی خوێندکاران، رەنگە خوێندکار پارەیەکی زۆر خەرج بکات بۆ رازاندنەوەی مێزی ئاهەنگی دەرچونەکەی و خوێندکارێش هەیە پارەی پێنییە.
”ئەنجومەنی زانکۆی سلێمانی بڕیاریداوە بەهیچ جۆرێک مێز و خواردن و شیرینی نەچێتە ناو زانکۆوە، تەنیا نیو کاتژمێر هەیە بۆ وێنەگرتن، دواتر خوێندکار سەربەستە لە دەرەوە چی دەکات”، یۆهان عوسمان وای وت.
پێداچوونەوە: هاوبەش