دیمەنی چەن چاڵێک دوای پڕکردنەوەیان - وێنە: میدیاکانی بازیان
بووبوونە مەترسی
دوو گەنج چاڵییەکانی شەقامای بەردەقارەمان – بازیانیان چاککرد
964+
پێشەوا محەمەد
دوو گەنجی دانیشتووی گۆپاڵە چاڵییەکانی شەقامی گشتیی بازیان – بەردەقارەمانیان چاک کرد، کە مەترسییان بۆ هاتوچۆی شۆفێران دروستکردبوو.
ئەو دوو گەنجە ئەمڕۆ چوارشەممە بە چیمەنتۆ چاڵییەکانیان پڕکردووەتەوە و مەترسیی هاتوچۆیان لەسەر ئەو شەقامە نەهێشتووە.
نەوزاد جەلال، سەرۆکی شارەوانیی بازیان بە 964ـی راگەیاند، دەستخۆشی لەو گەنجانە دەکەن بۆ ئەو کارە، بەڵام ئەوە پڕکردنەوەی کاتییە و چارەسەری خراپی و چاڵییەکانی شەقامەکە نییە.
ئەو چاڵانەی لە شەقامەکدا بوون بە تایبەت لە شەواندا کێشەی بۆ شۆفێران دروست دەکرد و ئەگەری دروستکردنی رووداوی هاتوچۆی هەبووە.
سەرۆکی شارەوانیی بازیان وتیشی، “دەبێت ئەو شەقامە بکڕێندرێت و سەرلەنوێ قیر بکرێتەوە، بەدەرلەوە هەر چارەسەرێکی دیکەی بۆ بکرێت کاتی دەبێت و وایلێدێتەوە”.
قەزای بازیان لە پێنج شارۆچکە و 58 گوند پێکدێت و ژمارەی دانیشتووانەکەی نزیکەی 80 هەزار کەسە.
نەوزاد جەلال جەختی کردەوە کە پێویستیی قیرتاوکردنیان زۆرە، بەڵام رەزامەندی لەسەر هیچ پڕۆژەیەکیان نادرێت.
