بە هۆی باران و لافاو
زۆربەی رێگاکانی هاتوچۆی سنووری دهۆک داخراون
964+
هیڤی دێوالی – دهۆک
بە هۆی بارانبارین و لافاوەوە زۆربەی رێگاکانی هاتوچۆ لە شاری دهۆک و قەزای ئامێدی زیانیان بەرکەوتووە و داخران.
لە پارێزگای دهۆکدا تیمەکانی شارەوانی و بەرگری شارستانی و رێگاوبان، لە هەوڵی کردنەوەی زۆربەی رێگاکانی دهۆک و قەزای ئامێدی و دەوروبەریدان.
رێدیر سلێمان بەرپرسی راگەیاندنی بەڕێوەبەرایەتیی گشتیی رێگاوبانی دهۆک، بە 964ی وت، رێگا سەرەکییەکانی گوندی بەرێ بەهار بۆ ناحیەی زاویتە و رێگای گەلیی زاویتە بۆ قەزای ئامێدی داخراون.
وتیشی، رێگاکان زیانی بەرکەوتووە و هەوڵی پاککردنەوەی دەدرێت، بە هەماهەنگی لەگەڵ تیمەکانی شارەوانی.
بە پێی زانیاری 964ی ، لە قەزای ئامێدیش نزیکەی 10 گوندی دەڤەری بەرێ گارەی رێگاوبانەکانیان لەناوچووە، تەنیا پێنج گوند لە دەڤەری بەرێ گارەی ئاوەدانن، ئەوانیش گوندەکانی “دێرەش، گەلەکا، مەهیدێ، هەڤندکا، پیروزانا”، کە رێگای هاتوچۆ داخراوە و زیاتر لە 150 ماڵی تێدا نیشتەجێن.
پێداچوونەوە: ئەرسەلان عەبدوڵا
