باخێکی زەیتوون - وێنە: میدیاکان
مەرجی هەیە
30 هەزار نەمامی زەیتوون بەسەر جوتیارەکانی ئامێدی و دهۆکدا دابەش دەکرێن
964+
پێشەوا محەمەد
بەڕێوەبەرایەتیی کشتوکاڵی دهۆک دابەشکردنی 30 هەزار نەمامی بە چەند مەرجێک بەسەر جوتیاراندا راگەیاند و دەڵێت، هەرجوتیارێک لەو دوو قەزایە مەرجەکانیان تێدایە سەردانیان بکەن.
نەمامەکان رێکخراوی Human Appeal دابینی کردوون و ناونووسین لە 16ـی ئەم مانگەوە دەستیپێکردووە و تا 25.2.2024 بەردەوام دەبێت.
بەڕێوەبەرایەتیی کشتوکاڵی دهۆک ئەمرۆ پێنجشەممە بڵاویکردووەتەوە، دەبێت ئەو جوتیارە لە قەزاکانی ئامێدی و دهۆک بێت، زەویی ئامادەی هەبێت و بەڵێننامەیەک پڕبکاتەوە، کە نەمامەکان بەخێو بکات و بەرهەمیان بهێنێت.
بە پێی راگەیەندراوەکەی کشتوکاڵی دهۆک، هەرجوتیارێک کە ئەو مەرجانەی تێدا بوو پێنج نەمامی زەیتوونی دەدرێتێ، لەگەڵ سیستمی ئاودێری و پەینی کیمیایی، هاوکات خولێکی دوو رۆژەشیان بۆ دەکرێتەوە بۆ چۆنێتیی بەخێوکردن و بەرهەمهێنانی نەمامی زەیتوونەکان.
Human Appeal رێکخراوێکی قازانج نەویستە و لە سەرانسەری جیهان کاردەکات بۆ بەهێزکردنی مرۆڤایەتی دژی هەژاری و نادادپەروەریی کۆمەڵایەتی و کارەساتی سروشتی، لە رێگەی دابینکردنی فریاگوزاریی خێرا و دامەزراندنی بەرنامەکانی گەشەپێدانی خۆپاراستن، ئامانجیان وەبەرهێنانە لە چارەسەری راستەقینە و کاریگەردا لە کارەساتە مرۆیی، ژینگەیی و تەندروستییەکاندا.
