شەش رۆژ دانراوە
چەمچەماڵ؛ پشکنینی DNA بۆ ناسینەوەی 172 رووفات دەکرێ
964+
هۆگر عەدنان – چەمچەماڵ
بۆ هاوتاکردنی پشکنینەکان لەگەڵ رووفاتی 172 ئه‌نفالكراو، کە له فه‌رمانگه‌ی پزیشكی دادی به‌غداوە گواسترانەوە هەولێر، مۆنۆمێنتی ئەنفال لە چەمچەماڵ پشکنینی DNA بۆ کەسوکاری ئەنفالکراوان دەکات.
رۆژانە نزیکەی 100 وارسی ئەنفال پشکنینی DNA یان، بۆ دەکرێت و پرۆسەکە بۆ ماوەی شەش رۆژ بەردەوام دەبێت، ترشی DNA هۆکارێکە بۆ هەڵگرتن و پاراستن و زانیارییە بۆ ماوەییەکان لە مرۆڤدا.
رۆژانە لە کاتژمێر 9:00ی بەیانی بۆ 2:00ی پاشنیوەڕۆ، لەلایەن لیژنەیەکی نێودەوڵەتی پەیوەست بە کاروباری بێسەرشوێنبووان ICMP و دەزگای شەهیدانی عێراق و فەرمانگەی کاروباری پاراستنی گۆرەبەکۆمەڵەکان عێراق و پزیشکی دادی بەغدادەوە و پڕۆسەکە بەڕێوەدەچێت.
ئەمڕۆ شەممە 17.2.2024، هابیل ئەحمەد بەڕێوبەری مۆنۆمێنتی ئەنفال لە چەمچەماڵ بە 964ی وت، پشکنینیDNA زیاتر بۆ ناسینەوەی کەسوکاری ئەو 172 رووفاتەی مانگی پێشووە، کە لە بەغداوە هێندرانەوە بۆ سلێمانی و بەمنزیکانە دەهێنرێتەوە بۆ مۆنۆمێنتی ئەنفال، دەستپێکێکی گرنگیشە بۆ ئەوەی تەواوی کەسوکاری ئەنفالکراوان لە چەمچەماڵ پشکنینیان بۆ بکرێت.
بۆ هەرکەسێک دەیەوێت پشکنین بکات، ژمارەیەک هۆکاری پەیوەندی دانراون:
ژمارە تەلەفۆن:
گەرمیان – 07719492754
چەمچەماڵ – 07503373577
ئیمەیڵ :
[email protected]
ئەو رووفاتانەی رەوانەی هەرێمی کوردستان کراونەتەوە، خەڵکی دەڤەری خاڵخاڵان و ئاغجەلەرن لە قەزای چەمچەماڵ، بڕیاره لە مۆنۆمێنتی شه‌هیدان له چەمچەماڵ بە خاک بسپێردرێن، هێمن حەسیب، چالاکوان لە بواری جینۆساید و ئەنفال، بە 964ـی وت لە ساڵی 2019 بەهۆی رەشەبا و زریان لە دەشتایەکانی ناوچەی باب شێخ سەر بە پارێزگای سەماوە، ئەم رووفاتانە دەرکەوتن و پاشان رەوانەی پزیشکی دادی بەغدا کران.
پێداچوونەوە: ئەحمەد مستەفا
200 رێکخراو و نووسەر داوای هێنانەوەی رووفاتی 171 ئەنفالکراو دەکەن
