کۆبوونەوەى ئەنجومەنى پارێزگاى کەرکوک شکستى هێنا

964+

وریا فەتاح

سەرەڕاى ئامادەبوونى دوو لیستی کوردی و پێکهاتەی مەسیحی لە هۆڵى ئەنجومەنى پارێزگاى کەرکوک، بەڵام بەهۆى تەواو نەبوونى رێژەى یاسایى و بایکۆتى پێکهاتەى عەرەب و تورکمان، کۆبونەوەکە شکستیهێنا، یەکێک لە ئەگەرەکانى بەردەم ئەنجومەنى پارێزگاى کەرکوکیش هەڵبژاردنى پێشوەختەیە، ئەگەر لایەنەکان نەگەن بە رێککەوتن.

د. ئەحمەد کەرکوکى، ئەندامى ئەنجومەنى پارێزگاى کەرکوک لە فراکسیۆنى هاوپەیمانى کەرکوک هێز و ئیرادەمانە، بە 964ى وت،”لەسەر داواى پارێزگار بەوەکالەتى کەرکوک بۆ یەکەمین کۆبونەوەى ئەنجومەنى پارێزگا چوینە هۆڵى کۆبونەوە، جگە لە ئێمە پارتى دیموکراتى کوردستان و پێکهاتەى مەسیحیش کە لە هەشت ئەندام پێکهاتووین، بەشداریمان کرد و چاوەڕێ بووین تا یەکەم کۆبونەوە گرێ بدرێت”.

بەوتەى ئەو ئەندامەى ئەنجومەنى پارێزگاى کەرکوک، بەهۆى بایکۆتى پێکهاتەى تورکمانى و عەرەبى، نەتوانرا رێژەى یاسایى کۆبونەوەکە تەواو بکرێت و کۆبونەوەکە بۆ کاتێکى نادیار دواخرا.

“ئەمڕۆ وەک کورد، چوینە هۆڵى کۆبونەوە و بۆ ماوەیەک چاوەڕێمان کرد، لەو رێگەیەوە پەیامێکماندا و وێنەیەکى جوانى بەیەکەوە بوونمان نیشاندا”، ئەحمەد کەرکوکى واى بە 964 وت.

هەرچەندە تائێستا هیچ رێککەوتنێک نیە لەسەر دیاریکردنى کەسێک بۆ پارێزگارى کەرکوک، بەڵام وەک ئەوەى ئەندامەکەى فراکسیۆنى “هاوپەیمانى کەرکوک هێز و ئیرادەمانە” باسى لێدەکات، فراکسیۆنە کوردییەکان واتا پارتى و یەکێتى هەماهەنگى زۆر باش لە نێوانیاندایە و دەیانەوێت لەگەڵ پێکهاتەکانى دیکەش بگەن بە چارەسەر بۆ ئەوەى چیتر کۆبونەوەکان دوانەخرێت و پێکهاتەى نوێى ئەنجومەنى پارێزگا و پارێزگارى نوێ هەڵببژێردرێت.

بەپێى لێکدانەوەکانى 964 بۆ پێکهاتەى ئەنجومەنى پارێزگاى کەرکوک کە هیچ هێز و پێکهاتەیەک نەیتوانیوە 50+1ى کورسییەکانى ئەنجومەنەکە بباتەوە و سێ پێکهاتەى سەرەکیش لە ناو ئەنجومەنەکەدان، بۆیە ئەگەرى رێککەوتن لەسەر هەڵبژاردنى پارێزگار قورس دەکات.

زانیاری ورد لەبارەی هەڵبژاردنی ئەنجومەنی پارێزگاکان لە کەرکوک

پارێزگارى نەینەوا هەڵبژێردرا