964+
دووەم عەمرەکاری ئەمساڵە
عەمرەکارێکی کورد گیانی لەدەستدا
964+
پێشەوا محەمەد
بەرەبەیانی ئەمڕۆ شەممە 3.2.2024 عەمرەکارێکی کوردی خەڵکی ئیدارەی زاخۆ لە وڵاتی سعودییە دوای بەجێگەیاندنی ئەرکە ئایینییەکەی گیانی لەدەستدا.
کاروان ستوونی، بەڕێوەبەری راگەیاندنی حەج و عەمرەی کوردستان بە 964ـی راگەیاند، ئەمساڵ ئەوە دووەم عەمرەکارە لە کاتی بەجێهێنانی ئەو ئەرکەدا گیان لەدەست بدات و هەردووکیشیان ژن بوون.
وتیشی، “هەموو ئەو عەمرەکارانەی لە سعودییە گیان لەدەست دەدەن لەسەر داواکاریی کەسوکاری خۆیان لە سعودییە دەنێژرێن و گۆڕستانێک هەیە سەرجەم ئەو عەمرەکارانەی لێ دەنێژرێن و کۆدێکیان دەدرێتێ و هەرکاتێک بچنە ئەو گۆڕستانە دەتوانن سەردانی مردووەکەیان بکەن”.
بەپێی ئاماری بەڕێوەبەرایەتییەکە، ساڵی رابردوو 10 عەمرەکاری کورد گیانیان لەدەستداوە، شەشیان ژن بوون و چواریشیان پیاو بوون.
“ئەو وڵاتە لەبەر پیرۆزییەکەی کەسوکاری مردووەکان دەیانەوێت لەوێ بنێژرێن، هێنانەوەشی تێچوویەکی زۆری دەوێت، بەڵام ئەگەر کەسوکاری مردوویەک سووربن لەسەر هێنانەوەی کەسەکەیان ئەوا دەکرێت و رێکاری هێنانەوەی هەیە و ئێمەش ئاسانکارییان بۆ دەکەین”، ئەوەش قسەی کاروان ستوونییە.
تەنیا لە وەزری ئەمساڵی عومرە 10 عومرەکاری کورد گیانیان لەدەستداوە
