شوانکارێکی گەنج لە پرۆژەی ئاوی حەویجە خنکا

964+
کاروان ساڵحی – کەرکوک

ئێوارەی ئەمڕۆ چوارشەممە شوانکارێکی تەمەن 16 ساڵ لەکاتی گەڕانەوەی بۆ ماڵ کەوتە ناو پرۆژەی ئاوی حەویجە و بەر لە گەیشتنی بە نەخۆشخانە گیانیلەدەستدا.

عەدنان عەبد دانیشتوی گوندی رەبیعە بە 964ـی وت، شوانکارەکە ناوی (ئەوس باسل)ە، تەمەنی 16ساڵە و دانیشتوی گوندی رەبیعەی سەر بە قەزای حەویجەیە، لەدوای لەوەڕاندنی ئاژەڵەکانی لەکاتی گەڕانەوەی بۆ ماڵ کەوتووەتە پرۆژەی ئاوی قەزاکە لە سنوری گوندەکەیان و لەلایەن دانیشتوانی گوندەکە دەرهێنراوە، گەیاندراوەتە نەخۆشخانەی حەویجە لەوێ گیانیلەدەستداوە.

سەرچاوەیەکی پزیشکی لە نەخۆشخانەی گشتی حەویجە بە 964ـی وت، رێگای نێوان نەخۆشخانە و گوندەک دوورە بەر لە گەیشتنی بە نەخۆشخانە گیانیلەدەستداوە، وتیشی ماسولکەکانی بە هۆی ساردی ئاوەکە توشی کرژبوونەوە هاتبوو.

قەزای حەویجە سەر بە پارێزگای کەرکوکە، دەکەوێتە باشوری رۆژئاوای شاری کەرکوک.

له‌ كه‌ركوك پۆلیسی فیدڕالی شوێنی ده‌سه‌ڵاتی سه‌ربازی ده‌گرێته‌وه‌