وێنەی ئەو گەنجانەی لە لیبیا دەستگیرکراون. وێنە:کەسوکاری یەکێک لەو گەنجانەی دەستگیرکراوە بۆ 964ی ناردووە.
چواریان بێ سۆراغن
پێنج گەنجی کورد دەیانویست بەرەو ئەوروپا بڕۆن لە لیبیا دەستگیرکران
964+
بڕوا مەجید
پێنج گەنجى دانیشتوى هەرێمى کوردستان لەلایەن پۆلیسى لیبیاوە دەستبەسەر کراون، تەنیا یەکێکیان ئازاد کراوە و چواریان ماوەى 11 رۆژە بێ سۆراغن.
گەنجە دەستبەسەرکراوەکان، تەمەنیان لە نێوان 16 بۆ 20 ساڵیدایە و خەڵکى، سەیدسادق و کۆیە و شارەزور و پیرەمەگرونن، بەپێى زانیارییەکانى 964 کە لە کەسوکارى گەنجێکیانەوە دەستى کەوتووە، زیاتر لە مانگێکە لە رێگاى چون بۆ ئەوروپا لە لیبیان و 11 رۆژە، لەلایەن پۆلیسى ئەو وڵاتەوە دەستبەسەرن.
میران عاسى، براى یەکێک لە گەنجەکانە، بۆ 964 قسەى کردووە و دەڵێت: براکەم تەمەنی 20ساڵە و خەڵکی شارەزوورین، لە 1.12.2023ى ساڵی رابردوەوە، براکەم رۆیشتووە و قاچاخچییەکە بەڵێنیداوە لە رێگەى لیبیاوە بە خێرایى بانگەیەنێت بە ئەوروپا، بەڵام دواى گەیشتنى بە لیبیا و مانەوەى بۆ ماوە 25 رۆژ، دواتر هیچ دەنگیان نەماوە، بەڵام دواى ئازادبونى هاوڕێییەکى پێیوتین کە لەلاى پۆلیسى ئەو وڵاتەوە دەستگیرکراون.
11 رۆژە براکەى میران دەستبەسەرە و بەوتەى میران عاسى، هەر ئەوەندە دەزانن کە دەستگیرکراوە و هیچ دەنگێکى نییە.
یەکێک لەو گەنجانە بەناوى سەرهەنگ جەنگى بۆ 964 وتى،”لە رێگاى بەغدادەوە چوینە میسر، دواتر چوینە لیبیا، لە گوندێکى سنورى نێوان لیبیا و تونس ماینەوە، بەڵام شەوى 2.1.2024، لەلایەن پۆلیسەوە دەستگیرکراین و ژمارەمان 40 کەس بوو، بەڵام تەنیا پێنج کەسمان کورد بوین و ئەوانى تر سورى و لیبى و بەنگلادیشى بوون”.
هەرچەندە سەرهەنگ ئازاد کراوە، بەڵام تائێستا نەگەڕاوەتەوە بۆ کوردستان و وەکخۆى دەڵێت: چاوەڕێى ئازادبوونى هاوڕێکانمم”.
پێداچوونەوە- وریا فەتاح
