964+
هاوپەیمانی نیشتیمانی داوا دەکات
داوای پێکهێنانی هێزێکی هاوبەشی پێشمەرگە و حەشدی شەعبی و سوپای عێراق دەکرێت
964+
ژووری هەواڵ
لەبارەی ئەو هێرشانەی دەکرێنە سەر هێزەکانی هاوپەیمانان و بوونی هێزە بیانیەکان لەسەر خاکی عێراق، هاوپەیمانی نیشتیمانی عێراق کە ئەیاد عەلاوی سەرکردایەتی دەکات، ئەمڕۆ چوارشەممە بەیاننامەیەکی بڵاوکردەوە و تیایدا هاتووە، پێویستە هێزێکی هاوبەش لەنێوان سوپای عێراق و پێشمەرگە و حەشدی شەعبی دروست بکرێت بۆ رووبەڕووبونەوەی ئالنگارییەکان.
ئەمە بەیاننامەکەی هاوپەیمانی نیشتیمانی عێراقییە:
هێرشەکانی سەرهێزەکانی هاوپەیمانان و کاردانەوەکانی رەنگدانەوەی لەسەر سەقامگیری عێراق دەبێت و کاریگەری نەرێنی لە سەر ئاسایشی وڵات دەبێت.
پێوێستە هێزەکانی هاوپەیمانان لە رووی چەندێتی و چۆنیەتی سنوردار بکرێت و هەموو هەڵسوکەوت و جوڵانەوەکانیان لە ژێر چاودێری بەپرسانی حکومەتی عێراق و سەرکردایەتی سوپا بێت.
هێرشەکانی ئەو دواییە دەریدەخەن، مەترسی زیاتر هەڕەشە لە سەروەری عێراق دەکات و دەرخەری ئەوەیە سیاسەتی ئەمریکا لە ناوچەکە روون نیە و هەڕەشە لە ئاسایشی ناوچەکە دەکات و پارێزگاری و پاڵپشتی ئیسرائیل و تاوانکاریەکانی دەکات، جیا لەوەش دەستی هێرشی زیاتر بۆ سەر خاکی عێراق رادەکێشێت.
لەم روەوە هاوپەیمانی نیشتیمانی داوا دەکات هێزێکی هاوبەشی سەربازی سوپای عێراق و پێشمەرگە و حەشدی شەعبی پێکبهێنرێت لە ژێر فەرمان و سەرپەرشتی، سەرکردایەتی سەربازی سوپای عێراق بێت.
