بەشێک لە یەکەکانی وەزارەتی ئاوەدانکردنەوە لە سیتەکی سلێمانی - وێنە: 964
نۆ هەزار و چوار یەکە دابەش دەکرێن
کەمئەندامان لە وەرگرتنی یەکەی کەمدەرامەتان خاڵی زیاتریان پێدەدرێت
964+
پێشەوا محەمەد
وەزارەتی ئاوەدانکردنەوە لە کاتی جیاکردنەوەی فۆڕمی یەکەی کەمدەرامەتاندا سێ خاڵ بۆ کەمئەندامان زیاد دەکات بۆ وەرگرتنی یەکە.
وەزارەتەکە تا 1.12.2023 فۆڕمی دابەشکردنی نۆ هەزار و چوار یەکە دابەش دەکات و لەدوای ئەو وادەیەشەوە لە رێگەی لیژنەیەکەوە فۆڕمەکان جیادەکرێنەوە و یەکەکان دابەش دەکرێن.
سامان حسێن، سەرۆکی یەکێتی کەمئەندامانی کوردستان بە 964ـی راگەیاند، کارێک کراوە کە کەمئەندامان لە کاتی جیاکردنەوەی فۆڕمەکان سێ خاڵی زیاتریان پێبدرێت و چانسی وەرگرتنی یەکەیان هەبێت.
وتیشی، “لە هەرێمی کوردستان 88 هەزار کەمئەندام بوونیان هەیە و لە بارودۆخێکی خراپی ژیانکردندان و پێویستیان بە هاوکاری و دەستگیرۆییە”.
بە پێی زانیارییەکانی 964 کە لە وەزارەتی ئاوەدانکردنەوە و نیشتەجێکردنی حکومەتی هەرێمی کوردستانەوە دەستی کەوتووە، تا ئێستا لەسەرو 25 هەزار فۆڕم بۆ وەرگرتنی یەکەکانی وەزارەتی ئاوەدانکردنەوە پڕکراونەتەوە.
