له‌ دهۆك پرۆژه‌یه‌كی گه‌وره‌ى به‌خێوكردنى ماسی له‌ ته‌واوبووندایه‌

964+

فه‌رهاد حه‌سه‌ن

له‌ دهۆك پڕۆژه‌یه‌كی ستراتیژیی ماسی كارى له‌سه‌رده‌كرێت، ئێستا ته‌نیا له‌ یەکەم قۆناغى ته‌واوبوونیدا زیاتر له‌ هه‌زار تۆن ماسی به‌رهه‌م ‌هێناوه‌.

پڕۆژه‌كه‌ وه‌به‌رهێنانه‌ و له‌سه‌ر ئاوى به‌نداوى دهۆك له‌ سنوورى ناحیه‌ى فایده‌ى  قه‌زاى سێمێل به‌ رووبه‌رى 72 دۆنم و له‌سه‌ر وشكانیش به‌ رووبه‌رى 157 دۆنم دروست ده‌كرێت.

به‌شه‌كانى پڕۆژه‌كه‌ پێکدێت لە هەڵهێنەری ماسی، حەوزی خول، بەخێوکردنی ماسی بە شێوەی قەفەز، هەروەها کارگەی ئالیک و تاقیگە.

رێدیر سدقى شه‌ریف، بەڕێوەبەری سامانی ئاژەڵ لە دهۆک به‌ 964ـى وت قۆناغى یه‌كه‌مى ئه‌م پڕۆژه‌یه‌ ته‌واوبووه‌ و به‌رهه‌مه‌كه‌شی نزیكه‌ى هه‌زار و 200 تۆنه‌.

لە قۆناغى یەکەمى ئه‌م پڕۆژه‌یه‌دا، رووبه‌رى 30 دۆنم ئاو به‌كارهێندراوه‌ و تێیدا 20 قەفەس بە پانی 30 مەتر و قوڵایی 6 مەتر دروستكراون.

به‌ڕێوه‌به‌رى سامانى ئاژه‌ڵ ده‌ڵێت، هەر قەفەسێک لە ساڵێکدا توانای به‌رهه‌می 60 تۆن ماسی هه‌یه‌.

ئاماژه‌ى به‌وه‌ش كردووه‌، بە تەواوبوونی پڕۆژەکە بەرهەمهێنانى دەگاتە چوار هەزار و 500 تۆن له‌ ساڵێكدا و ئه‌مه‌ش ته‌واوى پێداویستی ناوخۆی دهۆک پڕبکاتەوە.

لە سنوورى پارێزگای دهۆک تا ساڵى 2022 ژماره‌ى پڕۆژه‌كانى ماسی كه‌ مۆڵه‌تیان هه‌بووه‌،‌ 59 پڕۆژە بووه‌، به‌ڵام به‌هۆى كه‌مبوونه‌وه‌ى ئاو و وشكه‌ساڵییه‌وه‌، ئێستا ته‌نیا 39 پرۆژەی مۆڵەتپێدراو و نزیکەی 500 ماسیگریش مۆڵەتییان پێدراوە.

لە بەنداوی دێوانە تا دوو ساڵی دیکە کەس بەتەمای راوە ماسی نەبێت

گۆپتەپەییەکان دژ بە راوی ماسی گروپییان دروست کردووە