تائێستا هیچ کەمپێکی ئاوارەکان لە دهۆک نەوتیان وەرنەگرتووە

964+

هیڤی دێوالی – دهۆک

تا ئێستا لە کەمپی ئاوارەکانی دهۆک نەوت دابەش نەکراوە، بەرێوەبەرایەتی کۆچ و کۆچبەرانی دهۆکیش دەڵێت، “چاوەرێی لایەنی پەیوەندیدارین”.

بەگوێرەی ئاماری بەڕێوەبەری کۆچ و کۆچبەرانی دهۆک لە سنووری پارێزگای دهۆک 20 کەمپی ئاوارەکان هەیە، زیاتر لە 188 هەزار و 920 کەس کە ئاوارەکانی شنگال و پەنابەری خەڵکی رۆژئاوای کوردستانن لەو کەمپانە نیشتەجێن.

پیردەیان جەعفەر، بەڕێوەبەری کۆچ و کۆچبەرانی دهۆک بە 964ـى وت، لە سەرەتای مانگی 11ـەی هەموو ساڵێکدا نەوت بەسەر کەمپەکانی دهۆک دابەش دەکرێت، بەڵام ئەمساڵ هیچ دەنگوباسێکی نییە.

وتیشی، ئەمساڵ مۆڵەتی نەوتمان لە فەرمانگەی کۆچ و کۆچبەرانی دهۆک لە بەغدا وەرگرتووە کە سەر بە وەزارەتی کۆچ و کۆچبەرانە، چاوەڕوانی وەڵامی لایەنە پەیوەندیدارەکان دەکەین، هەر کاتێک نەوتەکە گەیشتە سەرەی کەمپەکانی دهۆک دابەشی دەکەین.

بەقسەی بەڕێوەبەری کۆچ و کۆچبەرانی دهۆک، ئاوارەکان و پەنابەرەکانی دەرەوەی کەمپەکانیش نەوتیان وەرنەگرتووە، لەگەڵ لایەنە پەیوەندیدارەکانیش لە هەوڵدان بۆ دابین کردنی نەوت بۆیان.

پێداچوونەوە: توانا نەقی

لە هەرێم کەمپی ئاوارەکان کەم دەکرێنەوە