ناوبازاڕی قەزای بازیان - وێنە: 964
ئێستا ناو دەنووسرێت
خولێکی دورمان بۆ 60 ژنی بازیان دەکرێتەوە
964+
پێشەوا محەمەد
خولێکی دورمان بۆ 60 ژنی ناو قەزای بازیان دەکرێتەوە و بۆ ماوەی مانگێک بەردەوام دەبێت.
خولەکە لە لایەن رێکخراوی داریکەلی بۆ پەرەپێدانی کۆمەڵگا بێبەرامبەر دەکرێتەوە و لە ئێستادا ناو دەنووسرێت.
پەژار ئەحمەد، ئەندامی دەستەی کارگێڕی رێکخراوی داریکەلی بە 964ـی وت، “بەردەوام خولی چاککردنەوەی مۆبایل، سەرچاک کردن، زمانەکانی ئینگلیزی و فارسی و عەرەبی و دورمان و چەندانی تر بێبەرامبەر دەکەینەوە”.
دەشڵێت، ئامانج لە کردنەوەی خولەکانیان دەستگیرۆیی گەنجان و پیاوان و ژنانە کە ببنە خاوەن پیشەی خۆیان و لە بازاڕی کاردا بتوانن بچنە سەر پیشەی خۆیان.
بە پێی رێنمایی رێکخراوەکە، ئەو ژنەی بەشدار دەبێت پێویستە تەمەنی لەسەروو 18 ساڵەوە بێت و خولەکە لە بینای کتێبخانەی گشتی بازیاندا هەفتەی چوار رۆژ بۆ ماوەی دوو کاتژمێر دەوترێتەوە و لە کۆتاییشدا بەشداربووەکان بڕوانامە وەردەگرن.
