بەڕێوەبەرایەتیی گشتی بەنداوەکان: %57ـی بەنداوی گۆمەسپان تەواو کراوە

964+

پێشەوا محەمەد

%57ـی کارەکانی بەنداوی گۆمەسپان لە پارێزگای هەولێر تەواو کراوە و بەڕێوەبەری بەنداوەکانی هەرێم دەڵێت، کارەکانی خێراتر دەکەن.

تێچووی دروستکردنی ئەو بەنداوە 95 ملیار دینارە، کۆتایی ساڵی 2021 دەست بەکارکردن کراوە، بەرزییەکەی 70 مەتر و درێژییەکەشی 512 مەترە، دەتوانێت 115 ملیۆن مەتر سێجا باراناو کۆبکاتەوە.

رەحمان خانی، بەڕێوەبەری بەنداوەکانی هەرێم بە 964ـی راگەیاند، بەنداوەکە یەکێکە لە ستراتیژیترین پڕۆژەکانی وەزارەتی کشتوکاڵ و سەرچاوەکانی ئاو و دەبێت سێیەم گەورەترین بەنداو لە هەرێم.

وتیشی، “چاودێریی هەنگاو بە هەنگاوی دروستکردنی بەنداوەکە بە شێوەی پڕۆفیشناڵانە دەکەین”.

بەنداوەکە لەسەر رووبەری شەش ملیۆن و 125 هەزار مەتر دووجا دروست دەکرێت.

لە هەرێمی کوردستان 17 بەنداوی سەرەکی هەیە و ساڵانە توانای گلدانەوەی 10 ملیار مەتر سێجا ئاویان هەیە، دیارترینیان بەنداوەکانی دوکان، دەربەندیخان و دهۆکن.

جگە لەوانەش ئێستا وەزارەتی کشتوکاڵ و سەرچاوەکانی ئاو، کار لە دروستکردنی 17 بەنداوی دیکەدا دەکات.

لەمەودوا بەنداوەکان وەک شوێنێکی گەشتیاری دروست دەکرێن