پیاوێک لە بەردەم ATMـی بانکێکدا وەستاوە و پارە رادەکێشێت. وێنە: Getty Images
موچە بەشێوەی ئەلیکترۆنی
رەنگە پێش سەری ساڵ هەرێمی کوردستان ببێتە خاوەنی بانکی نیشتیمان
964+
ژووری هەواڵ
دوو ساڵە وەزارەتی بارزگانی هەرێمی کوردستان سەرقاڵی دامەزراندنی بانکێکە بەناوی “بانکی نیشتیمان”، ئێستا رێکارەکان بەرەو کۆتایی دەچن و بەپێی زانیارییەکان پێدەچێت پێش سەری ساڵی 2024 بکرێتەوە.
وەرگرتنی موچە بەشێوەی ئەلیکترۆنی
بەگوێرەی ئەو پلانەی خراوەتەڕوو، ئەو بانکە بەشێک دەبێت لە بانکی ناوەندیی عێراق و ئیتر لەوێوە بەشەبودجەی کوردستان دەخرێتە سەر هەژمارەکانی حکومەتی هەرێم.
چاوەڕێدەکرێت هەر لەو بانکەوە موچەی فەرمانبەران بە ئەلیکترۆنی بکرێت و لە رێگەی لقەکانیەوە بتوانرێت بە کارت رابکێشرێت.
هەر مانگێک بۆ دوو مانگی ماوە
بڵند محەمەد، بەڕێوەبەری گشتیی تۆماری کۆمپانیاکان لە وەزارەتی بازرگانی و پیشەسازیی هەرێمی کوردستان بە 964ـی وت، دامەزراندنی بانکەکە تەنیا هەندێک رۆتیناتی ماوە لە بانکی ناوەندیی، رەنگە تاوەکو مانگێک یان دوو مانگی دیکە تەواو ببێت.
وتیشی، بانکەکە باوەڕپێکراوە و هەر ئۆفەر و خزمەتگوزارییەک لە بانکی ناوەندیی عێراق هەبێت ئەوا لە بانکی نیشتیمانیش دەبێت.
لەلایەکی دیکەوە، کازم نامیق ئەحمەد بەڕێوەبەری گشتی بانکی ناوەندی عێراق/لقی هەرێمی کوردستان بە 964ـی وت، روون نییە کەی رێکارەکانی کردنەوەی بانکی نیشتیمان تەواو دەبن.
دەبێتە دەستەخوشکی رافیدەین و رەشید و TBI
بانکی ناوەندیی عێراق چەندین هاوبەشی دیکەی هەیە وەکو بانکی رافیدەین، بانکی رەشید و بانکی TBI، کە هاوڵاتیان و موچەخۆرانی عێراقی بۆ کاروبارەکانیان سوودیان لێدەبینن، چاوەڕێدەکرێت بانکی نیشتیمانیش بچێتە ریزی ئەوانەوە.
