نەخۆشەکانی نەخۆشخانەی قەڵا نێردرانە ماڵەوە و داخرا

964+

میلاد جەلال – گەرمیان

بەهۆی پێنەدانی موچەکانیانەوە، کارمەندانی نەخۆشخانەی قەڵا لە گەرمیان بایکۆتیان راگەیاند و نەخۆشخانەکەش داخرا.

نەخۆشخانەی قەڵا تایبەت کرابوو بە حاڵەتەکانی سکچوون و رشانەوە، 25 حاڵەت لە نەخۆشخانەکە ھەبوون ئەمڕۆ نێردرانەوە ماڵەوە.

یەکێک لە کارمەندانی نەخۆشخانەی قەڵا بە 964ـی وت، “نەخۆشەکان ئیزن دران و نێردرانەوە ماڵەوە و قوفڵ لە دەرگای نەخۆشخانەکە درا.”

بەھۆی پێنەدانی موچەکانیانەوە، ھەریەک لە نەخۆشخانەی گشتیی کەلار، نەخۆشخانەی قەڵا ، نەخۆشخانەی فریاکەوتنی شەھید ھەژار، فەرمانگەی قەرزی بچووک، شارەوانییەکانی گەرمیان، بانکی خانووبەرە و دادگای بەرایی کەلار بایکۆتی دەوامیان کردووە و 964 دەزانێت بەشێکی تر لە بەڕێوەبەرایەتی و فەرمانگەکانی گەرمیان دەوامیان کردوە بە چەند رۆژ جارێک.

حارس محەمەد، بەڕێوەبەری نەخۆشخانەی قەڵا بە 964ى وت، “کارمەندانی فەرمی تەندروستی و خۆبەخشەکانی نەخۆشخانەی قەڵا بایکۆتی دەوامیان کردووە و ناچار بوون کە نەخۆشخانەکە دابخەن.”

ئاماژەی بەوەش کرد، لە ئەمڕۆوە ھیچ حاڵەتێکی سکچوون و رشانەوە لە نەخۆشخانەکە وەرناگیرێت.

پێداچوونەوە: پێشەوا محەمەد

دوو رۆژە کارمەندانی شارەوانییەکانی گەرمیان بایکۆتی دەوامیان کردووە