وێنەی تیمی ئاگر کوژێنەوەی پۆلیسی دارستانی سلێمانی. وێنە:پۆلیسی دارستانی سلێمانی.
20 دۆنم پووش و پاوانی سوتاند و دەستگیر کرا
964+
فەهمی نەبی
پۆلیسی دارستان و ژینگەی سلێمانی لە ناحیەی بنگرد کەسێکیان دەستگیرکردووە، کە دەستی هەبووە لە سوتاندنی 20 دۆنم پووش و پاوانی ناوچەکە.
دوای ئەوەی ئەمڕۆ پێنجشەممە، ئاگرێک لە سنووری ناحیەی بنگرد دروست بوو، لەگەڵ تیمەکانی ئاگر کوژێنەوە، پۆلیسی دارستان و ژینگەی سلێمانی گەیشتوونەتە ئەو شوێنە و لێکۆڵینەوەیان دەستپێکردووە.
عەمید هێمن کەمەرخان، بەڕێوەبەری راگەیاندنی پۆلیسی دارستان و ژینگەی سلێمانی بۆ 964 وتی، “ئەو کەسە لە گوندی سێدەر ئاگرەکەی کردووەتەوە و دوای ئەوەی تیمەکانمان گەیشتنە شوێنەکە ئەو کەسەیان دەستگیرکرد”.
بەڕێوەبەری راگەیاندنی پۆلیسی دارستان و ژینگەی سلێمانی ئەوەش دەڵێت، “بەپێی یاسا مامەڵەی لەگەڵ دەکرێت، ئەمساڵ چەند کەسێک بەهەمان هۆکار دەستگیرکراون”، بەبێ ئەوەی ئاماژە بە ژمارەکەیان بکات.
ناحیەی بنگرد دەکەوێتە قەزای دوکان لە پارێزگای سلێمانی.