دیمهنى كۆمهڵێك مینى دژهكهسی ... وێنه: دهزگاى مین
حکومەتی هەرێم:
پێنج ملیۆن مەتر دوجا زەوی هه‌رێم لە مین پاککراوەتەوە
964+
فه‌رهاد حه‌سه‌ن
حکومەتی هەرێم ده‌ڵێت، توانیویەتی لە چوار ساڵی رابردودا و لە رێگەی دەزگای گشتیی کاروباری مینەوە، پێنج ملیۆن و 38 هەزار و 629 مەتر دوجا زەوی پاکبکاتەوە.
بەپێی ئه‌و داتایانه‌ى كه حکومەت بڵاویكردووه‌ته‌وه، تەنها لە ساڵی 2019-2020دا لە هەر چوار پارێزگاى هەرێمی کوردستان، دوو ملیۆن و 56 هەزار و 657 مەتر دوجا زەوی لە 68 کێڵگەی مین پاککراونەتەوە، کە تیایاندا پێنج هەزار و 92 مینی دژەکەسی و نۆ مینی دژە تانک و شه‌ش هەزار و 759 تەقەمەنی جۆراوجۆر لەناوبراون.
لە ساڵانی 2020 و 2021دا نزیکەى 249 هەزار و 832 مەتر دوجا زەوی لە شەش کێڵگە پاککراونەتەوە کە هەزار و 472 مینی دژەکەسیی و 26 مینی دژەتانک و 21 هەزار و 805 پارچەى تەقەمەنییان تێدا بووە و لەناوبراون.
هەربەپێی داتاکان، لە ساڵی 2021 – 2022، رووبەری 690 هەزار و 268 مەتر دوجا زەوی، پاککراوەتەوە، کە ژمارەى کێڵگەى پاککراوەى مین لەو چوارچێوەیەدا 23 کێڵگە بووە کە تیایدا دوو هەزار و 179 مینی دژە کەسی و 246 مینی دژە تانک و 19 هەزار و 330 تەقەمەنی جۆراوجۆر لە نێو بردراون.
حکومەتی هەرێم دەڵێت، لە چوارەم ساڵی کابینەى نۆیەمدا، دوو ملیۆن و 41 هەزار و 854 مەتر دوجا زەوی پاککراوەتەوە و ژمارەى کێڵگەى پاککراوى مین 49 کێڵگە بووە، ژمارەى مینی دژەکەسیی لەناوبراو سێ هەزار و 648 مین و مینی دژەتانکی لەناوبراو هه‌شت مین بووە. هەروەها ژمارەى پارچەى تەقەمەنی لەناوبراو 23 هەزار و 415 تەقەمەنی بووە.