بۆ ماوەی مانگێك
گۆشتفرۆشێكی سلێمانی نرخی گۆشتی خۆماڵی كرد بە 9 هەزار دینار
964+
ئەحمەد محەمەد – سلێمانی
یەكێك لە گۆشتفرۆشەكان كە دوكانەكەی دەكەوێتە گەڕەكی چوارباخی سلێمانی، بۆ ماوەی مانگێك نرخی گۆشتی دابەزاندووە و خاوەنەكەی دەڵێت، “بڕیارمانداوە نەهێڵین گۆشت لە سلێمانی گرانبێت”.
یەحیا سەعدون، خاوەنی دوكانەكەیە و خەڵكی موسڵە، بەڵام بەكوردییەكی رەوان قسەی بۆ 964 كردووە و وتی، “نرخی كیلۆیەك گۆشتی گوێرەكەی خۆماڵیمان كردووە بە 9 هەزار دینار و سوپاس بۆخوا خێریش دەكات بۆمان و ناهێڵین گۆشت لەسلێمانی گران بێت”.
وتیشی، داشكاندنەكە بۆ ماوەی مانگێكە و لە 1.12.2024 بۆ 1.1.2025 دەبێت، بەڵام هەوڵدەدەین بەردەوام بین و ركابەریشمان نییە لە ناوشاری سلێمانی و تەنیا خۆمان بەو نرخە دەیفرۆشین.
ئەوەشی خستەڕوو، خەڵك لە گۆشتەكەمان رازییە و تا ئێستا كەس گلەیی نەكردووە، ئەو گۆشتەی ئێمە كردوومانە بە 9 هەزار، بە زیندەقەپان لەنێوانی 6 هەزار بۆ 6 هەزار و 500 دینارە.
نرخی کیلۆیەک گۆشتی گوێرەکە لە بازاڕ نزیکەی 15 هەزارە و ئەم دەیدات بە 9 هەزار بەرخیش کیلۆی بە نزیکەی 20 هەزارە و ئەم گۆشتفرۆشە دەیدات بە 15 هەزار دینار.
هیوا حەمە ساڵح، كڕیارێكی بەردەوامی دوكانەكەیە و وتی، لە گۆشتەكە رازین و ناسكە و هەرزانیشە، بۆ دوكانەكەی خۆم لێرە قیمە دەبەم و بۆ بەرگر بەكاریدەهێنین.
پێداچوونەوە: توانا نەقی
