دەتوانن بێ بەرامبەر بینەرى فیلمەکان بن
ئۆفەرێکى بەخۆڕایى بۆ خوێندکارانى زانکۆ و پەیمانگاکان راگەیەنرا
+964
زەید کۆچەر-دهۆک
فێستیڤاڵى نێودەوڵەتیی فیلمى دهۆک، دەستپێشخەرییەک بۆ خوێندکارانى زانکۆ و پەیمانگاکان رادەگەیەنێت و لەگەڵ دەستپێکردنى فێستیڤاڵەکە، خوێندکاران دەتوانن بەخۆڕایى بینەرى فیلمەکان بن.
حەسەن عارف، وتەبێژى فێستیڤاڵەکە بە 964ى وت،” 116 فیلم لە فێستیڤاڵەکەدا نمایش دەکرێن و خوێندکارانى زانکۆ و پەیمانگاکان بەبێ بەرامبەر و بەخۆڕایى دەتوانن بینەرى فیلمە جۆراوجۆرەکان بن”.
هۆڵى کۆنفرانسەکان لە ناو زانکۆى دهۆک، ئەو شوێنەیە کە خوێندکاران دەتوانن تێیدا بینەرى فیلمەکان بن.
حەسەن عارف باسى لەوەش کرد، پێویستە خوێندکاران باجیان پێبێت و لەگەڵ خۆیان بیهێنن بۆ ئەوەى بتوانن بینەرى فیلمەکان بن.
بڕیارە رۆژى 9.12.2023، دەیه‌مین فێستیڤاڵی نێودەوڵەتیی فیلمی دهۆک به ناونیشانی زمانی کوردی بۆ کورتە فیلم و بەڵگە فیلمەکان دەستپێبکات و تا رۆژى 16.12.2023، بەردەوام دەبێت .
پێداچوونەوە: وریا فەتاح
