دوکانێکی مریشک فرۆش لە قەزای ئاکرێ.وێنە:+964
هەر کیلۆیەک مریشک 600 دینار گران بووە
964+
زەید کۆچەر – دهۆک
ماوەی کەمتر لە هەفتەیەکە هەرکیلۆ مریشکێک لە شاری دهۆک 600 دینار گران بووە، هاوڵاتیان پێیان گرانە و کێڵگەکانیش دەڵێن ئەو نرخە بۆ ئەوان باشە.
پێشتر نرخی یەک کیلۆ کەمتر لە دوو هەزار دینار بوو، بەڵام ئێستا بووە بە دوو هەزار و 500 دینار.
رێدیر سدقی شەریف، بەڕێوەبەری سامانی ئاژەڵ لە دهۆک بە 964ـی وت، “نرخی مریشک لە دهۆک بە گشتی جێگیر بوو، بەڵام کێڵگە پەلەوەرییەکان تووشی زەرەر بوون و ئێستا ئەو نرخە باشە”.
وەک خاوەن کێڵگەکان خۆیان دەڵێن، ئەو نرخەی ئێستا باشە و تووشی زەرەر نابن.
“پێشتر ئێمە بەو نرخەی دەمانفرۆشت زیاتر لەسەر خۆمان دەکەوت، بەڵام ئێستا باشە و زۆریش گران نەبووە، نازانین بۆچی هاوڵاتیان گلەییان لە نرخەکەی هەیە”، ئەوە قسەی ئەرشەد سیاری، ئەندامی کۆمەڵەی گارە بۆ پڕۆژە پەلەوەرییەکانی دهۆکە بۆ 964.
پێداچوونەوە: پێشەوا محەمەد