حەوت بەنزینخانە لە هەولێر داخران

+964

هاوبەش ئەبوبەکر

لە هەولێر حەوت بەنزینخانە دەستکاری کوالێتیی سووتەمەنیان کردووە و بەنزینی کوالێتی خراپیان بە هاوڵاتیان فرۆشتووە، لەسەر ئەوە داخران و سزادران.

ئەمڕۆ پێنجشەممە 3.8.2023، نەبەز عەبدولحەمید قایمقامی هەولێر بە 964ـی راگەیاند، لە ماوەی پێنج رۆژی رابردوودا، لیژنەکانیان پشکنینیان بۆ 50 بەنزینخانە کردووە و حەوت دانەیان بەهۆی فرۆشتنی بەنزینی خراپ داخراون.

لە ماوەی یەک مانگی رابردوودا لە هەولێر، 29 بەنزینخانە بەهۆی فرۆشتنی بەنزینی کوالێتی خراپ داخراون.

دوایین جار لە رێکەوتی 27.7.2023، لیژنەکانی قایمقامیەتی هەولێر نۆ بەنزینخانەیان بە هەمان هۆکار داخست.