كوردە فەیلیەكانی خانەقین داوای ناسنامە دەكەن

+964
ڕاژان باجەڵان – خانەقین

بەشێك لە كوردە فەیلیەكانی دانیشتوی خانەقین گردبوونەوە و دوای ناسنامە دەكەن

كوردە فەیلیەكان كە لە عێراق دەژین هیچ ناسنامەیەكیان نییە، ئەمڕۆ بەشێكیان لەبەردەم قایمقامیەتی خانەقین گرد بوونەوە و داوای پێدانی رەگەزنامەی عێراقی دەكەن.

هاشم نگاە لەدایکبووی 1987ە وگەنجێکی فەیلییە، بە 964ی وت، ساڵانێکە داوای رەگەزنامەی
عێراقی دەکەن و پێیان نادرێت ئێستا خۆی و خێزانەکەی و منداڵێکی وشەش منداڵی کۆچکردووی
براکەی هیچیان رەگەزنامەی عێراقییان نییە و بەو پێیە نە دەتوانن بچنە قوتابخانە،
نە دەتوانن سەفەری شوێنێک بکەن.

عەبدولرەحمان كەریم دەروێش، سەرۆكی كۆنفرانسی فەیلیەكان لە كوردستان بە 964ی راگەیاند، “فەیلیەكان لە عێراقدا هیچ مافێكیان نییە، نە ناسنامە و نە هیچ شتێكیان نییە، لە ماوەی رابردووشدا حكومەتەكانی عێراق زۆر سزایانداوین وئیستاش عێراق مافمان دەخوات”.

لە ناوچە جێناکۆکەکانی هەرێمی كوردستان لە شارەكانی خانەقین و بەدرە و جەسان و جەلەولا و خزرەوات و شارەبان و قەزانیە و سۆمار و چەند ناوچەیەكی دیكە كوردی فەیلی دەژین.

لەعێراقیش لە شارەكانی بەغدا و حلە و نەجەف و كەربەلا و ناسریە و بەسرە بە چڕی دەژین و لە چەند ناوچەیەكی دیكەش هەن.

بەقسەی عەبدولرەحمان دەروێش، ژمارەی كوردە فەیلیەكان لەسەرتاسەری عێراقدا بە هەرێمی كوردستانیشەوە نزیكەی دوو ملیۆن هاوڵاتی دەبن.
پێداچونەوە: كوردستان ئەحمەد