لەسەر سکاڵای هاوڵاتیان زیادەڕۆیی سەر باخچەکان لادەبردێت

964+

فەرمان سادق

لەسەر سکاڵای هاوڵاتیان بەڕێوەبەرایەتی ئەندازەی پارکەکانی هەولێر هەڵمەتێکی بۆ لابردنی زیادەڕەوی سەر باخچەکان دەستپێکرد.

ئەو هاوڵاتیانەی سکاڵایان گەیاندووەتە بەڕێوەبەرایەتی ئەندازەی پارکەکانی هەولێر، سکاڵایان لە بۆنی ناخۆشی بەخێوکردنی پەلەوەر و نەبوونی ئاو کردووە.

لە سکاڵاکاندا هاتووە کە بەشێک لەو ماڵانەی باخچەیان هەیە، شەو تاوەکو بەیانی سۆندەی ئاو لەسەر باخچەکانیان بەردەوەنەوە و ئەمەش وایکردووە بەشی پێویستی ئاو بەوان نەگات.

سکاڵایەکە لە کاتێکدایە لە زۆرینەی گەڕەکەکانی هەولێر گرفتی کەمی ئاو هەیە کە وەک پێویست بە هەموو ماڵێک ناگات.

رێبین ئەحمەد، بەڕێوەبەری پارک و باخچەکانی هەولێر بە 964ـی وت، تیمەکانیان بەردەوامە لە لابردنی سەرپێچییەکان، بەڵام سکاڵای هاوڵاتیان وایکردووە کە لیژنەیەکی هاوبەش لەنێوان ئەندازەی پارکەکان و شارەوانی گەڕەکەکان و قایمقامیەت پێکبهێندرێت.

دەشڵێت: ئەوانەی تاوەکو ئێستا کەپری ئۆتۆمبێل و باخچەیان دروستکردووە، رێکدەخرێنەوە، ئەوانەشی ئێستا بە نیازن دروستی بکەن ئەوا رێنمایی نوێیان بۆ دەردەکرێت، هەر کەسێکیش بێ پرسی ئەندازەی پارکەکان کەپر یان باخچەیان دروستکردووە ئەوا وەک زیادەڕۆ لێی دەڕواندرێت و تێکدەدرێن.

لە سەنتەری هەولێر 20 پارکی گەورە و 360 باخچەی ناو گەڕەکەکان و 88 دورگەی ناوەندنی و 70 دارستان هەیە، کە بە گشتی دەکاتە 460 پارک و باخچە.

بەڕێوەبەرایەتی ئەندازەی پارکەکانی هەولێر داوا لە هاوڵاتیان دەکات کە پەیوەندی بە ژمارە مۆبایلی (07504783130) بکەن بۆ هەماهەنگی لابردنی زیادەڕۆییەکانی کراونەتە سەر باخچەکانی ناو گەڕەکەکان.