سایلۆی هەولێر - وێنە: 964
ناوی 546 جوتیاری تر بۆ وەرگرتنی گەنم تۆمار دەکرێت
964+
پێشەوا محەمەد
بە مەبەستی وەرگرتنی گەنم لێیان، ناوی 546 جوتیاری تر دەنێردرێت بۆ وەزارەتی کشتوکاڵ و ئەنجومەنی پارێزگای سلێمانیش دەڵێت، ناوی هەزاران جوتیار تۆمار نەکراوە.
ناردنی ئەو ناوانە لە لایەن ئەنجومەنی پارێزگای سلێمانی و بەڕێوەبەرایەتی کشتوکاڵەوە بووە.
بە پێچەوانەی ساڵی رابردووەوە، ئەمساڵ بۆ ئەوەی جوتیاران گەنمیان لێوەربگیرێت دەبوو ناویان تۆمار بکردایە و نووسراویان وەرگرتایە، بەڵام جوتیارێکی زۆر ناوی تۆمار نەکردووە.
“بەشێکی زۆری جوتیاران ئاگایان لە میدیا نییە و سەیری سۆشیال میدیا ناکەن، بۆیە نەیانزانیوە دەبێت ناو تۆمار بکەن و ئێستاش ناویان نییە”، ئەمە وتەی کاسترۆ مەعروف، ئەندامی ئەنجومەنی پارێزگای سلێمانییە بۆ 964.
حکومەتی عێراق ئەمساڵ 500 هەزار تۆن گەنم لە جوتیارانی هەرێم وەردەگرێت و بۆ هەر تۆنێکیش 850 هەزار دینار دیاریکراوە.
کاسترۆ مەعروف وتیشی، “ئەمساڵ خراپترین پڕۆسەی وەرگرتنی گەنم هەبوو و پێویستە حکومەتی هەرێم بیر لەوە بکاتەوە خۆی گەنم لە جوتیاران وەربگرێت و هانبدرێن تا لە کاری جوتیاری دوورنەکەونەوە”.