قوتابخانەکانی ناحیەی تانجەرۆ نۆژەن دەکرێنەوە

964+

پێشەوا محەمەد – سلێمانی

هەڵمەتی نۆژەنکردنەوەی قوتابخانەکانی ناحیەی تانجەرۆ دەستیپێکردووە، بەڕێوەبەرایەتی ناحیەکە دەڵێت، هەڵمەتەکە هەندێ لە فەرمانگەکانیش دەگرێتەوە.

سەرەتا لە قوتابخانەکانی ئامادەیی شنروێ، پاییزی بنەڕەتی و بونیادی بنەڕەتییەوە دەستیپێکردووە.

کاری نۆژەنکردنەوەکە بە سەرپەرشتی ناحییەی تانجەرۆ دەبێت و بودجەکە لە لایەن رێکخراوی کۆچی نێودەوڵەتییەوە “IOM”ـەوە دابیندەکرێت.

بەڕێوەبەرایەتیی ناحیەی تانجەرۆ ئەمڕۆ سێشەممە 13.6.2023 بڵاویکردووەتەوە، ئەو رێکخراوە بە نیازە چەندان پڕۆژەی دیکەی گرنگ بۆ ناحیەکە جێبەجێ بکات.

“ئەو رێکخراوە ئەو قوتابخانانە نۆژەن دەکاتەوە، کە ئاوارەیان تێدایە و ئێمەش ئەو هەلەمان قۆستووەتەوە بۆ نۆژەنکردنەوە و پاککردنەوەیان”، ئەمە وتەی ئاری ئەنوەر، بەڕێوەبەری پلاندانانە لە پەروەردەی سلێمانی بۆ 963.

ناحیەی تانجەرۆ سەر بە پارێزگای سلێمانییە و 71 گوندی لەسەرە.