وریا غەفوری. فۆتۆ: سۆشیال میدیا
وریا غه‌فوری وازی له یاریكردن هێنا
964+
ئه‌رسه‌لان عه‌بدوڵا
وریا غه‌فوری، یاریزانی ناوداری كورد و پێشووی هه‌ڵبژارده‌ی ئێران، له تۆڕی ئینستاگرام پۆستێكی كردووه و ده‌ڵێت، بڕیاری وازهێنانی له یاریكردن داوه و چیتر یاریی ناكات.
وریا غه‌فوری دوای چه‌ندین ساڵ یاریكردن له هه‌ڵبژارده‌ی ئێران و یانه‌ی ئیستقلال و چه‌ند یانه‌یه‌كی دیكه، بڕیاری وازهێنانی دا و له ستۆریی ئینستاگرامه‌كه‌ی خۆیدا هه‌واڵه‌كه‌ی راگه‌یاندووه، به‌ڵام هۆكاری وازهێنانه‌كه‌ی ئاشكرانه‌كردووه.
وریا خه‌ڵكی سنه‌یه و ئێستا ته‌مه‌نی 35 ساڵه، له ماوه‌ی رابردووشدا به‌هۆی رووداوه جیاجیا سیاسی و كۆمه‌ڵایه‌تییه‌كانی ئێران، هه‌ڵوێستی ئاشكرا و بوێرانه‌ی هه‌بووه، ئه‌مه‌ش وایكرد له‌لایه‌ن ده‌سه‌ڵاتدارانی ئێرانه‌وه دژایه‌تی بكرێت و له هه‌ڵبژارده‌ی ئێرانیش دووربخرێته‌وه.
وریا له یانه‌كانی نه‌فتی تاران، سپاهان، ئیستقلال و فولاد یاریی كردووه، ماوه‌یه‌ك كاپاتنی یانه‌ی ئیسقلال بوو، هه‌روه‌ها له 2014 تا 2019 له‌گه‌ڵ هه‌ڵبژارده‌ی ئێران یاریی كرد و به‌شداریی مۆندیالی 2018ی رووسیایشی كرد.