باڵەخانەی دەستەی دەستپاکی عێراق. وێنە: دەستەی دەستپاکی.
ویستویانە 23 ملیار دینار بۆ خۆیان گلدەنەوە
964+
فەهمی نەبی
دەستەی دەستپاکی عێراق رایدەگەیەنێت، تیمەکانیان توانیویانە 25 فەرمانبەری بەڕێوەبەرایەتی چاکسازی و دوو بەڕێوەبەری ئەو دەزگایە لەبەغدا دەستگیربکەن کە بەنیازبوون زیاتر لە 23 ملیار دینار بۆخۆیان گلدەنەوە.
راگەیەنراوەکەی دەستەی دەستپاکی ئەمڕۆ 23.3.2023 بڵاوکراوەتەوە.
ئەو 25 فەرمانبەرە هاوکات جێگری بەڕێوەبەر و بەڕێوەبەری ژمێریاری فەرمانگەی چاکسازییان لەگەڵ بووە.
تیمەکەی دەستەی دەستپاکی بڕیاری دادوەریان پێ بووە و خۆیان کردووە بە بەڕێوەبەرایەتی چاکسازی بەغدا، ئەو فەرمانبەرانە بەنیازبوون لەرێگەی دروستکردنی مامەڵەی ساختەوە بڕی 23 ملیار و 362 ملیۆن و 650 هەزار دینار بۆخۆیان هەڵبگرن
ئەو فەرمانبەرانەی بەڕێوەبەرایەتی چاکسازی 502 مامەڵەیان ساختەکردبوو لەبەرژەوەندی کۆمپانیای نیشتیمانی پیشەسازی کانزا و پایسکل.
دەستەی دەستپاکی رایدەگەیەنێت ئەو پرۆسەیە بە فەرمانی دادوەر بەڕێوەچووە و دوای بڕیاری دادوەر ئەو کەسانە دەستگیرکراون.