لە سنووری پێنجوێن سەدان ماسی مەترسی لەناوچوونیان لەسەرە – وێنە؛ پۆلیسی دارستان و ژینگەی سلێمانی
ژمارەیەکی زۆریان گواسترانەوە
لە سنووری پێنجوێن سەدان ماسی مەترسی لەناوچوونیان لەسەرە
شۆڕش قادری
بەهۆی کەمبوونەوەی ئاوی چەم و رووبارەکانی، لە سنووری پێنجوێن سەدان ماسی مەترسی لەناوچوونیان لەسەرە، کارمەندانی پۆلیسی دارستان و ژینگە بەهانایەنەوە چوون و ژمارەیەکی زۆریان گواستنەوە.
بەڕێوەبەرایەتی پۆلیسی دارستان و ژینگەی سلێمانی دەڵێت، دوای ئەوەی لە سنووری گوندی ( بێستان)ـی سەر بە ناحیەی گەرمک ئاوی گۆمێك بەرەو کەمبوونەوە دەچێت و سەدان ماسی رووبەڕووی لەناوچوون و مەترسی بوونەوە، کارمەندانی بنکەی پۆلیسی دارستان و ژینگەی گەرمك چوونەتە شوێنەکە و دەستیان بە گواستنەوەی ژمارەیەکی زۆر لەو ماسیانە کردووە، بۆ چەمی (گۆلێ).
ئاماژە بەوەشکراوە، بە هەوڵی ئەو کارمەندە ماندوونەناسانە، ژمارەیەکی زۆر لەو ماسیانە لە لەناوچوون رزگارکراون.
