ئەو کارگەیەی لە عەربەت دوکەڵی رەشی بڵاودەکردەوە درایە دادگا – وێنە؛ بەڕێوەبەرایەتی پۆلیسی دارستان و ژینگەی سلێمانی
"خاوەنەکەی دەستگیر دەکرێت"
ئەو کارگەیەی لە عەربەت دوکەڵی رەشی بڵاودەکردەوە درایە دادگا
شۆڕش قادری
ئەو کارگەیەی دوکەڵێکی رەشی پیسی بەردابووە ژینگەی عەربەت، درایە دادگا و و خاوەنەکەی دەستگیر دەکرێت.
بەڕێوەبەرایەتی پۆلیسی دارستان و ژینگەی سلێمانی چەند وێنەیەکی کارگەکەی لە دوورەوە بڵاوکردووەتەوە و نووسیویەتی، “دوای بڵاوبوونەوەی پۆستێک لە (سۆشیال میدیا) سەبارەت بە دووکەڵی کارگەکان و پیسبوونی ژینگە، تیمەکانی بنکەکەمان بەدواداچوونی مەیدانی و وردیان بۆ ئەم بابەتە دەستپێکرد”.
دواتر مەفرەزەیەکی بنکەی پۆلیسی دارستان و ژینگەی عەربەت چوونەتە شوێنەکە بۆ پشکنین و دۆزینەوەی سەرچاوەی دووکەڵەکە.
دوای بەدواداچوونی ورد، کارگەیەک دیاریکراوە کە هۆکاری سەرەکی دروستبوونی ئەو دووکەڵە چڕە بووە کە ببووەهۆی تێکدانی ژینگەی ناوچەکە.
دادوەری لێکۆڵینەوەی شارەزوور لە بابەتەکە ئاگادارکراوەتەوە و لەسەر فەرمانی ئەو، پەڕاوی لێکۆڵینەوەی بۆ بابەتەکە کراوەتەوە، کارگەکە دراوەتە دادگا و فەرمانی دەستگیرکردن بۆ خاوەنەکەی دەرچووە.