کیسێ گۆڵی بردنەوەی بۆ بارسا تۆمار کرد. فۆتۆ: سۆشیال میدیا
بارسێلۆنا 12 خاڵ له ریال مه‌درید دووركه‌وته‌وه
964+
ئه‌رسه‌لان عه‌بدوڵڵا
یانه‌ی بارسێلۆنا یاریی كلاسیكۆی گه‌ڕانه‌وه‌ی له خولی ئیسپانیا له یانه‌ی ریال مه‌درید برده‌وه، به‌مه‌ش جیاوازیی نێوانیانی بۆ 12 خاڵ به‌رزكرده‌وه.
له گه‌ڕی 26ی لالیگای ئیسپانیا، یانه‌ی بارسێلۆنا به ئه‌نجامی 2-1 گۆڵ له یانه‌ی ریال مه‌دریدی برده‌وه.
یارییه‌كه شه‌وی رابردوو كرا و تێیدا سێرجی رۆبێرتۆ و فرانك كیسێ گۆڵه‌كانی بارسێلۆنایان له خوله‌كه‌كانی 45 و 90 تۆماركرد، گۆڵی ریال مه‌دریدیش ئاراوخۆی یاریزانی بارسا به هه‌ڵه له سه‌ره‌تای یارییه‌كه‌دا له‌خۆیانی كرد.
هه‌روه‌ها ناوبژیوان گۆڵێكی ئه‌سێنسیۆی له خوله‌كی 81 ره‌تكرده‌وه، دوای ئه‌وه‌ی له رێگه‌ی ڤاره‌وه ئۆفسایدبوونی سه‌لمێنرا.
به‌م بردنه‌وه‌یه بارسێلۆنا ژماره‌ی خاڵه‌كانی گه‌یانده 68 خاڵ له پله‌ی یه‌كه‌می ریزبه‌ندی، ریال مه‌دریدیش به 56 خاڵ مایه‌وه و جیاوازییه‌كه بووه 12 خاڵ، به‌مه‌ش ئه‌ركی ریال مه‌درید قورستر بووه له ركابه‌ریی ئه‌م وه‌رزه بۆ بردنه‌وه‌ی لالیگا.
له دوای یارییه‌كه كۆرتوای گۆڵپارێزی ریال مه‌درید وتی، ریال مه‌درید ماڵئاوایی له ركابه‌ریی بردنه‌وه‌ی لالیگا كرد و كاره‌كه ئه‌سته‌م بووه.
ئه‌مه یه‌كه‌م بردنه‌وه‌ی بارسێلۆنا بوو له یارییه‌كانی كلاسیكۆ له یاریگه‌ی خۆی له‌وه‌ته‌ی 2018ـه‌وه، هه‌روه‌ها بردنه‌وه‌ی ژماره 100 بوو بۆ بارسا له دیداره‌كانی كلاسیكۆ.