سەرۆکى هەرێم: بەهیوام سەرکەوتنى عێراق بۆ مۆندیال ببێتە هاندەرێک بۆ تەبایى

964+

وریا فەتاح

نێچیرڤان بارزانی، سەرۆکی هەرێمی کوردستان، بەبۆنەی سەرکەوتنی هەڵبژاردەی عێراق بۆ مۆندیالی 2026، پەیامێکی پیرۆزبایی ئاراستەی عێراقییەکان و وەرزشوانان کرد و رایگەیاند، ئەم دەستکەوتە مێژووییە کە دوای 40 ساڵ چاوەڕوانی بەدیهات، جێگەی شانازیی هەموو عێراقییەکانە.

پەیامەکەی سەرۆکی هەرێمی کوردستان دوای ئەوە دێت کە هەڵبژاردەی عێراق توانی بە ئەنجامی (2 – 1) لە هەڵبژاردەی پۆلیڤیا بباتەوە و بە فەرمی بگاتە یارییەکانی مۆندیال لە مەکسیک.

سەرۆکی هەرێم دەڵێت، ئەم سەرکەوتنە مژدەیەکە و دوای 40 ساڵ چاوەڕوانی، شانازییەکی گەورەی بۆ عێراقییەکان تۆمار کرد.

نێچیرڤان بارزانی دەستخۆشی لە یاریزانان و ستافی هەڵبژاردەی عێراق کردووە کە بە هەوڵ و دڵسۆزیی خۆیان “خەونی مۆندیالیان کردە ڕاستی”.

هیوای سەرکەوتنی بۆ هەڵبژاردەکە لە ناو یارییەکانی مۆندیال خواستووە و هیوای وایە ئەم بردنەوەیە ببێتە هاندەرێک بۆ تەبایی و شادیی زیاتر بۆ هەمووان.

هەڵبژاردەی عێراق دوای ساڵی 1986، ئەمە یەکەمجارە دەگاتە یارییەکانی مۆندیال، کە بڕیارە لە ساڵی 2026 لە وڵاتانی ئەمریکا، کەنەدا و مەکسیک بەڕێوەبچێت.

عێراق گەیشتە مۆندیال