دژی بەقەزاکردنی جەلەولا
لە خانەقین بایکۆتە و دوکان و بازاڕ داخراون
964+
میلاد جەلال – خانەقین
دژی بەقەزاکردنی جەلەولا (گوڵاڵە) خانەقینییەکان بایکۆتیان راگەیاند و بازاڕ و دوکانیان داخست.
ئەمڕۆ چوارشەممە 25.2.2026 هاوڵاتیان و کاسبکارانی خانەقین دژی بڕیاری وەزارەتی پلاندانانی عێراق بۆ بەقەزاکردنی جەلەولا (گوڵاڵە) دوکان و بازاڕیان داخست و ئەوان دەڵێن کە، “بەو بڕیارە خانەقین وەک تاکە قەزا بەتەنیا ماوەتەوە”.
جگە لە کاسبکاران و دوکانداران، فەرمانگە حکومییەکانی خانەقینیش مانگرتنی گشتیان راگەیاند.
رۆژی دووشەممە 23.2.2025 وەزارەتی پلاندانان پلەی کارگێڕی “گوڵاڵە”ـی بەرزکردەوە و بەوەش بە فەرمی بوو بە قەزا و ناحیەی سەعدییەش خرایە سەر ئیدارەکەی.
بوونی دەریاچەی حەمرین و زەوییە کشتوکاڵییەکان و بەستنەوەی چەند پارێزگایەک بەیەکەوە، خاڵی بەهێزی گوڵاڵە بوون بۆ وەرگرتنی ئەم پلە کارگێڕییە.
گوڵاڵە لەرووى ئیدارییەوە ناحیەیەکى سەر بە قەزاى خانەقین بوو و یەکێکە لەو ناوچانەی مادەی 140ـی دەستوور دەیگرێتەوە و چارەنووسى لە نێوان هەرێم و عێراق بە نادیارى ماوەتەوە.
پێداچوونەوە؛ شۆڕش قادری
