بۆ پاڵپشتى لە رۆژئاوا
تابووتەکەى شەهید ئەحمەد دەکەن بە سیمبولى خۆپیشاندان
964+
کاروان ساڵحى – کەرکوک
چالاکوانانى کەرکوک بڕیاریانداوە، ئەو تابووتەى تەرمى شەهید ئەحمەدى لە رۆژئاواوە پێهێنراوەتەوە کەرکوک، نەیفەوتێنن و بیکەن بە سیمبولى خۆپیشاندانەکانى شارەکە بۆ پشتگیرى لە رۆژئاوا.
نەبەرد کاکەیى چالاکوانى مەدەنى بە 964ـى وت،”لەسەر داواى کەسوکار و خانەوادەى شەهید ئەحمەد، بڕیاریانداوە تابووتەکە نەفەوتێنن و بیکەن بە سیمبولى خۆپیشاندانەکانى کەرکوک”.
دەشڵێت: دواى سپاردەکردنى تەرمى شەهید ئەحمەد، ئاڵایەکى کوردستانمان خستە تابووتەکە، ئەوەش وەک گوزراشتێک بۆ ئەو پەیامەى کە شەهید ئەحمەد لە پێناوى ئەو ئاڵایە و کوردستان شەهید بووە.
شەهید ئەحمەد هێمن، یەکەم شەهیدى خۆبەخشى باشوورى کوردستان بوو کە لە رۆژئاواى کوردستان شەهید بوو.
پێداچوونەوە: وریا فەتاح
