" گەڕانەوە بۆ گفتوگۆ نەک بۆ شەڕ"
ئیدارەی خۆسەری داوا لە حکومەتی سوریا دەکات زمانی دیالۆگ بکاتە چارەسەری کێشەکان
964+
فەرهاد حەسەن
ئیدارەی خۆسەری باکور و رۆژهەڵاتی سوریا نیگەرانی قووڵی خۆی لە بارودۆخەکانی ئێستای ناوچەکەیان دەردەبڕێت و داواش لە حکومەتی ئینتقالی سوریا دەکات کە حیکمەت و بەرپرسیارێتی لە بڕیارەکانیدا بەکاربهێنێت و دانوستان بکاتە چارەسەری سیاسی و دەنگۆی ئەو میدیایانەش رەتدەکاتەوە کە باس لە بوونی پەیوەندی ئیدارەکە و وڵاتی ئێران دەکات.
بەپێی راگەیەندراوێکی ئیدارەی خۆسەر ئەو پەرەسەندنانە ئێستا روودەدەن بە ناڕەوا دادەنێت کە لەلایەن گروپەکانی سەر بە حکومەتی ئینتقالی سوریا لە دیمەشق بەڕێوەدەچێت و دەڵێت، شەرمەزاری توندی ئەم پەرەسەندنانە دەکەن چونکە بوونەتە هەڕەشەی مەترسیدار لەسەر سەقامگیری و ئاشتی لەو وڵاتەدا.
ئیدارەی خۆسەری باکور و ڕۆژهەڵاتی سوریا دووپاتی دەکاتەوە، وەک چەندین جار دووپاتی کردووەتەوە، کە زمانی دیالۆگ و گفتوگۆی بەرپرسیارانە بۆ چارەسەرکردنی کێشە هەڵپەسێردراوەکان دەبێت لە نێو هەموو هێزەکانی سوریادا زاڵ بێت، هەمانکات زمانی هەڕەشە و شەڕ و چەک رەتدەکاتەوە کە دەبێتە هۆی خوێنڕشتن و وێرانکاری زیاتر.
لەم چوارچێوەیەدا، ئیدارەی خۆسەری داوا لە هەموو هێزەکانی سوریا دەکات، یەکگرتوو بن لە رەتکردنەوەی قسەی رقاوی و لەبەرامبەریشدا هانی بەهێزکردنی برایەتی و بەهاکانی پێکەوەژیان و پێکەوەکارکردن بدرێت بۆ سوریایەکی لامەرکەزی کە بەبێ جیاوازی مافەکانی هەموو هاوڵاتیانی خۆی مسۆگەر بکات.
داواش لە حکومەتی ئینتقالی سوریا دەکات کە حیکمەت و بەرپرسیارێتی لە بڕیارەکانیدا بەکاربهێنێت و دانوستان و چارەسەری سیاسی لە سەرووی زمانی شەڕ و چەکەوە ئەولەویەت بێت، چونکە دەڵێت “ئەمە خزمەت بە بەرژەوەندی گەلی سوریا و یەکگرتوویی وڵات دەکات”.
ئامادەیی بەردەوامی خۆشی دووپاتدەکاتەوە بۆ گەڕانەوە بۆ گفتوگۆکردن لەسەر هەموو پرسەکان لەرێگەی دیالۆگ و لێکتێگەیشتن، بەمەبەستی راگرتنی خوێنڕشتن لە سوریا و پووچەڵکردنەوەی پیلانەکانی “دابەشکردن و حوکمڕانی” کە ئامانج لێی هاندانی ململانێی نێوان سوریاکانە.
سەبارەت بە هەواڵی هەندێک کەناڵ و ماڵپەڕیش کە بەجۆرێک باس لە پەیوەندییەکانی نێوان ئیدارەکە و ئێران دەکەن دەڵێت، “ئەوەی بڵاودەکرێتەوە زانیاری ناڕاستە لەسەر ئێمە و پەیوەندییەکانمان لەگەڵ وڵاتانی دیکە و بەتایبەت ئێران ” جەختیش لەوە دەکاتەوە کە “ئێمە دژی ئەو دەسەڵاتەین کە رۆژانە ژن و گەنجانی کورد، عەرەب، بەلووچی و فارس لە سێدارە دەدات و سیستەمێکی دێموکراتیک کە رێز لە مافی هەموو پێکهاتەکانی کۆمەڵگا بگرێت، تاکە بژاردەی ڕزگارکردنی گەلی ئێرانە”.
ئیدارەی خۆسەری لەسەر فڕێدانی تەرمی کچە شەرڤانەکەی شێخ مەقسوود هاتەدەنگ
