لە گوندێکی ناحیەی وەرتێ
ئۆتۆمبێل لە خوشک و برایەکی دا؛ هەردووکیان گیانیان لەدەستدا
964+
ئاکام غەفوور – سۆران
لە گوندێکی ناحیەی وەرتێ ئۆتۆمبێل لە خوشک و برایەکی دا کە قوتابین و هەردووکیان گیانیان لەدەستدا.
شۆڕش حەسەن، بەڕێوەبەری ناحیەی وەرتێ بە 964ـی وت، “لە گوندی سەرنەوس ئۆتۆمبێلێک لە دوو قوتابی داوە و بەسەختی برینداربوون و بەپەلە رەوانەی فریاکەوتنی سۆران کراون”.
لەوبارەیەشەوە د. بەرەڤان سەباح بەڕێوەبەری فریاکەوتنی سۆران بە 964ـی وت، “هەردوو قوتابییەکە لە نەخۆشخانە گیانیان لەدەستداوە”.
ئاماژەی بەوەشکرد، قوتابییەکان خوشک و برایەکن، یەکێکیان پۆلی یەکی سەرەتایی و ئەوەی دیکەشیان پۆلی پێنجی سەرەتاییە و تەمەنیان لە نێوان حەوت بۆ 10 ساڵدایە.
د. بەرەڤان سەباح وتیشی، ئەو خوشک و برایە لەکاتی چوونیان بۆ قوتابخانە و هەر لە گوندەکەی خۆیان تووشی ئەو رووداوە بوون.
پێداچوونەوە؛ شۆڕش قادری
