شۆفێرانی بارهەڵگری هەولێر تەواو بێزارن و هاتنە سەر شەقام

964+

عەبدولعەزیز خالند – هەولێر

شۆفێرانی بارهەڵگر لە هەولێر گردبوونەوە و دەڵێن، ئەگەر وابڕوات دەبێت ترۆمبێلەكانیان بفرۆشن، چونكە كرێی مەرزەكان كەمبووەتەوە و بۆیان دەریناهێنێت، جگە لەوەش شۆفێرانی ئێرانی و تورک باری ناوخۆیی بە هەرزانتر بار باردەكەن و رسقی ئەوانیان بڕیوە.

شۆفێرانی بارهەڵگری هەولێر ئەمڕۆ شەممە 10.1.2026 گردبوونەوە و ناڕەزاییان دەربڕی، ئەوان دەڵێن بارهەڵگری بیانی دێنە کوردستان و بار باردەکەن، بەڵام ئەوان بۆیان نییە بچینە دەرەوەی وڵات و کرێی ناوخۆییش کەمبووەتەوە، پێشتر لە هەولێرەوە بە 750 هەزار دینار دەچوونە باشماخ، بەڵام ئێستا بووەتە 325 هەزار، بۆیە بۆ ئەوان دەست نادات.

دانا سەردار، شۆفێرێكی بارهەڵگرە و بە 964ی وت، “ماوەیەکە تەواو بێزار بووینە لەدەست کەمیی کرێ و نەبوونی بار، لەبەر ئەوەی نرخەکەی کەمكراوەتەوە و باریش نییە، چونکە ئەو بارهەڵگرە بیانییانەی دێنە کوردستان، لە کاتی گەڕانەوە بار باردەکەن و بە پارەیەکی کەمتر، ئەوە بۆ ئەوان باشە، بەڵام بۆ ئێمە نا، چونکە پارەی گاز و مەسروفاتەکەش دەرناچێت”.

وتیشی، “کرێی مەرزی باشماخ لە هەولێرەوە پێشتر 750 هەزار دینار بوو، ئێستا 325 هەزارە، کرێی زاخۆ 400  هەزار بوو، ئێستا 200 هەزارە، کەواتە بۆ ئێمە هیچ سوودی نییە و وا بڕوات دەبێت ئۆتۆمبێلەکانمان بفرۆشین”.

ئەم ناڕەزایی و گردبوونەوەی شۆفێری بارهەڵگران تەنیا لە هەولێر نەبوو، بەڵكو ئەمڕۆ لە كەلاریش شۆفێرانی بارهەڵگر بە هەمان هۆكار گردبوونەوە و رایانگەیاند، شۆفێرانی ئێرانی و تورک ئەوانیان بێ كار كردووە و ترانزێت دەهێننە ناو كوردستان و باریش بەرەو سنوورەكان باردەكەن.

پێداچوونەوە: ئەرسەلان عەبدوڵا

"بار بۆ عێراقی نییە جگە لە ئێرانی و تورک"