یەكێك لە نەخۆشخانەكانی شاری بابل
لە عێراق
شەوی سەری ساڵ نزیكەی 500 كەس بریندار بوون
964+
ئەرسەلان عەبدوڵا
وەزارەتی تەندروستیی عێراق ئاشكرای كرد، شەوی سەری ساڵ نزیكەی 500 كەس بەهۆی یارییە ئاگرینەكان، تەقە و رووداوەكانی هاتوچۆ بریندار بوون
وتەبێژی وەزارەتەكە سەیف بەدر بە ئاژانسی هەواڵی عێراقی راگەیاندووە، وەزارەتەكەیان تۆماری رووداوەكانی شەوی رابردووی كردووە، كە ژمارەی كۆتاییش نییە و تێیدا نزیكەی 500 كەس بەهۆی رووداوی جۆراوجۆرەوە بریندار بوون.
وتیشی، لە ئامارەكەدا نزیكەی 300 كەس بەهۆی یارییە ئاگرینەكان، بریندار بوون، كە 200 كەسیان لە رەسافە و 67یان لە كەرخ و ئەوانی دیكەش لە شارەكانی دیكە بوون.
هەروەها ئاشكرای كرد، 43 كەس بە فیشەك و 140 كەس بە رووداوی هاتوچۆ و 86ی دیكەش بە رووداوی جۆراوجۆر بریندار بوون.
وتەبێژی وەزارەتی تەندروستیی عێراق دەڵێت، ئەوە ژمارەی كۆتایی نییە و بریندارەكان زیاترن، چونكە بەشێكی بریندارەكان نەچوونەتە نەخۆشخانەكان.
ئاماژەی بەوەش كرد، چارەسەری پێویست بە هەموو بریندارەكان دراوە و هەندێكیان رەوانەی نەخۆشخانەی دیكە كراون بۆ ئەوەی بمێننەوە، بەشێكی زۆری برینەكانیش سووك بوون.
