سێ ساڵی رەبەق دزییان لە فرۆشگای قوتابخانەیەک کرد؛ دەستگیر کران

964+

شۆڕش قادری

لە رانیە دوو بۆرە دز کە یەکێکیان مێردمنداڵە، سێ ساڵی رەبەق دزیان لە فرۆشگای قوتابخانەیەک کردووە، تازە بەتازە پێیانزانراوە و دەستگیر کراون.

رۆژی 18ـی ئەم مانگە هاوڵاتییەک سەردانی نوسینگەی نەهێشتنی تاوانی رانیەی کردووە و سکاڵای تۆمارکردووە لەسەر ئەوەی کە دەڵێت، “لە فرۆشگای خوێندنگای سەفین و راپەڕین دزیم لێکراوە و پارەیەکی زۆر و خواردنی فرۆشگاکەیان لێ دزیوم.”

دواتر بەشی پۆلیسی نەهێشتنی تاوانی راپەڕین بە هاوکاری بەشی پۆلیسی فریاکەوتنی دەڤەرەکە پەڕاوی لێکۆڵینەوەیان بۆ ئەو مەوزوعە کردووەتەوە و کەوتوونەتەخۆ بۆ ئەوەی تۆمەتباران بدۆزنەوە، دواجار گەیشتوونەتە ئەنجام و دوو کەسیان دەستگیر کردووە.

بەڕێوەبەرایتی پۆلیسی راپەڕین ناسنامەی تۆمەتبارانی ئاشکرا کردووە و دەڵێت، “دوو کەس بەناوەکانی (ئـ، ر، هـ) و (ئـ، ح، أ) کە یەکێکیان نەوجەوانە و ئەوەی تریان تەمەنی سەروو 18 ساڵە و لە رەگەزی نێرن، فێعلەکەیان کردووە، لە کاتی لێکۆڵینەوەکانیش دانیان بە تاوانەکەیاندا ناوە و وتوویانە، لە مانگی 9ـی ساڵی 2023ـەوە تاوەکو رۆژی 20.12.2025 لە کاتی جیاوازدا و بەڕێژەیەکی زۆر کە نەتوانراوە هـەژمــار بکرێت، دزیــان لە فرۆشگای ناوبراو کردووە و پارەیەکی زۆر و خواردنی فرۆشگاکەیان دزیوە”.

لەئێستاشدا هەردوو تۆمەتبارەکە بەبڕیاری دادوەر و بە ماددەی 443 لە یاسایی سزادانی عێراقی ڕاگیراون و لێکۆڵینەوەش لەگەڵیان بەردەوامە.

بۆ پرسە چووە رانیە؛ هەرچی پارەی پێبوو لەناو ئۆتۆمبێلەکی لێیدزرا

سێ تۆمەتبار لەسەر دزینی ئۆتۆمبێل لەلایەن پۆلیسی راپەڕینەوە لە چوارقوڕنە دەستگیرکران