لەناو بەرزکەرەوەیەکدا گیریانخواردبوو
لەلایەن تیمەکانى بەرگرى شارستانییەوە دوو هاوڵاتى رزگار کران
964+
وریا فەتاح
کاتژمێر 2ـى بەرەبەیانى ئەمڕۆ، دواى ئەوەى دوو هاوڵاتى بیانى لەناو بەرزکەرەوەیەکدا گیر دەخۆن، تیمەکانى بەرگرى شارستانى زوو بە فریایان دەکەون و رزگاریان دەکەن.
رووداوەکە لە هەولێر بووە و بە وتەى شاخەوان سەعید، وتەبێژى بەرگرى شارستانى هەولێر،”لە ناو بەرزکەرەوەى هۆتێل جێگر پاڵاس لە شارى هەولێر، لە کاتژمێر 2ـى بەرەبەیان دوو هاوڵاتى بیانى گیر دەخۆن، بەڵام لەلایەن تیمەکانمانەوە زوو فریایان کەوتن و رزگاریان کردن”.
باسى لەوەشکرد، لە کاتژمێر 2ى بەرەبەیان پەیوەندیان پێوەکراوە، بەڵام تیمى رزگارکردن بە تا کاتژمێر 2:30 خولەک، کۆتاییان بە پرۆسەکە هێناوە و دوو کەسەکە کە ئافرەت بوون، بەسەلامەت رزگارکراون.
بە وتەى شاخەوان سەعید، بەرگرى شارستانى هەولێر، تیمى تایبەتى هەیە بۆ ئەو حاڵەتانە و لە دەرەوە راهێنانیان پێکراوە کە دەتوانن بە 20 خولەک کەسێک رزگار بکەن کە لە ناو بەرزکەرەوەدا گیر بخوات.
داواش دەکات، لە حاڵەتى رووداوى لەو شێوەیە لە رێگەى ژمارە 115 و 125 ئاگاداریان بکەن، تیمەکانیان بەزوویى دەگەن.
