زاگرۆس نانەکەلی، یەکێک لە نووسەرانی کتێبەکە
هیچت لە بارەی ئەو وەرزشوانە دێرینە بیستووە؟
كتێبی “حەمە پشكە، ئەفسانە ونبووەكە” بڵاوكرایەوە
964+
ئەرسەلان عەبدوڵا
ئەمڕۆ پێنجشەممە لە هۆڵی بەڕێوەبەرایەتیی گشتیی وەرزش كتێبی وەرزشی “حەمە پشكە، ئەفسانە ونبووەكە” ناسێندرا و بڵاوكرایەوە، كە لە لایەن هەردوو نووسەر و رۆژنامەوانی وەرزشی زاگرۆس نانەكەلی و سەنگەر زرار نووسراوە.
964 لە بۆنەكە ئامادەبوو، كتێبەكەش باس لە ژیان و كاروانی وەرزشی وەرزشوانێكی دێرینی ساڵانی چل و پەنجا و شەستەكانی كوردستان دەكات بە ناوی “حەمە پشكە” كە لە سەرەتای حەفتاكان لە لایەن رژێمی بەعسەوە شەهید كراوە و كەمترین زانیارییش لە بارەی ژیانییەوە هەبووە.
كتێبەكە لە لایەن نووسینگەی كولتووریی جێگری سەرۆكی حكومەتی هەرێم قوباد تاڵەبانی چاپكراوە و لەئەستۆیان گرتووە.
زاگرۆس نانەكەلی یەكێك لە نووسەرانی كتێبەكە بە 964ی وت، هەوڵی زۆریان داوە تا سەرچاوەی زانیاری و نهێنییەكانی ژیانی ئەو وەرزشوانەیان دەستكەوتووە و لە كتێبێكدا كۆیان كردووەتەوە.
حەمە پشكە مێژوویەكی پڕ سەروەری لە وەرزشی عێراقدا هەبووە و لە هەڵبژاردەی عێراق یاریی كردووە، بەڵام كەمترین بایەخی میدیایی پێدراوە و زۆربەی نەوەی پێشووش نایناسن، بە پێی زانیارییەكانی ناو كتێبەكەش، لە سەرەتای حەفتاكانی سەدەی رابردوو، لە “قەسر ئەلنهایە” لە بەغدا لە لایەن رژێمی پێشووی بەعسەوە شەهید كراوە و تەرمەكەشی بە كەسوكاری نەدراوەتەوە و هیچ ئاسەوارێكی جێنەهێڵدراوە.
كتێبەكە زیاتر لە 230 لاپەڕەیە و چاپێكی ئارت و رەنگاوڕەنگی هەیە و لە سلێمانی چاپكراوە.
