هەولێر” وەک یەكێك لە باشترین شوێنە گەشتیارییەكانی ئاسیا دەستنیشان کرا

964+

ئەرسەلان عەبدوڵا

راپۆرتێكی گۆڤاری “کۆندی ناست تراڤێلەر” (Condé Nast Traveler شاری هەولێری وەك یەكێك لە باشترین شوێنە گەشتیارییەكان بۆ ساڵی 2026 دەستنیشان كردووە و پێشنیاری كردووە.

راپۆرتەكە رۆژی 4ی ئەم مانگە بڵاوكراوەتەوە و ئەمڕۆ سێشەممە 18.11.2025 پەیجی فەرمیی پارێزگای هەولێر بەشێكی راپۆرتەكەی ئاماژە پێداوە، هاوكات 964 گۆڤارەكەی بینی و لاپەڕەكانی تایبەت بە راپۆرتەكەی پشكنی.

هەروەها 964 پەیوەندی بە پارێزگار ئومێد خۆشناو كرد بۆ ئەم بابەتە، ئەویش پشتڕاستیكردەوە، كە گۆڤارەكە یەکێکە لە بەناوبانگترین و کاریگەرترین گۆڤارەکانی بواری گەشتوگوزار، شاری هەولێریشی وەك یەكێك لە باشترین شوێنە گەشتیارییەكان بۆ ساڵی 2026 دەستنیشان كردووە و پێشنیار كراوە، ئەمەش جێگەی شانازیی هەموو كوردستان و خەڵكی هەولێرە، دیارە بۆ ئەمەش هۆكاری زۆر هەن، بەڵام دیارترینیان هێمنی و ئاسایش و پێشكەوتنی بواری بازرگانی و پاكوخاوێنی و ئاسایشی گەشتیاران، هەروەها مێژوویی شارەكە و بایەخدانی حكومەتی هەرێم بە بابەتی گەشتیاری و دابینكردنی خزمەتگوزاری.

هەر لە بارەی ئەم بابەتە ئەمڕۆ سەرۆك وەزیرانی كوردستان مەسرور بارزانییش پۆستێكی لە تۆڕی ئێكس كردووە و نووسیویەتی ” هەولێری پایتەختی هەرێمی کوردستان، بەردەوامە لە ئیلهامبەخشین بە جیهان ”

راپۆرتەکە باسی چی كردووە؟

راپۆرتی گۆڤارەكە هەولێری لە تەك هۆنك كۆنگ و شارێكی ئیندۆنیسیا داناوە وەك باشترین شارەكان بۆ گەشتیاری لە 2026، لە چەند تەوەرێكیشەوە باسی هەولێر دەكات و دابەشی كردووە، كە گرنگترین خاڵەكانی ئەمانەن:

– سەقامگیری و ئاسایش

* راپۆرتەکە هەولێری بە “شوێنێکی ئارام لە ناوچەیەکی پڕ لە کێشەدا” وەسف کردووە. ئاماژەی بەوە کردووە کە شارەکە سەرکەوتوو بووە لەوەی خۆی وەک پەناگەیەکی سەقامگیر و ئارام نیشان بدات، دوور لەو ناونیشانە سیاسییە گەرمانەی کە زۆرجار لە ڕۆژهەڵاتی ناوەڕاست دەبیسترێن.

– مێژوو و کەلەپوور (قەڵا)

* ستایشی قەڵای هەولێری کردووە (کە لە لیستی یونسکۆدایە)، وەک کۆنترین شوێنی نیشتەجێبوون لە جیهاندا کە ژیان تێیدا بەردەوامە بۆ زیاتر لە 6000 ساڵ.

* وێنەیەکی جوانی بۆ ئەزموونی گەشتیاران کێشاوە: “خواردنەوەی چای شیرین لەژێر دیوارە دێرینەکانی قەڵادا، لەگەڵ پیاوانێک کە جلی کوردییان لەبەردایە”.

. نوێگەری و گەشەسەندنی شار

* راپۆرتەکە ئاماژەی بە دیمەنی بەرزکەرەوەکان (kren) و پڕۆژەکانی بیناسازی کردووە وەک بەڵگەیەک بۆ پێشکەوتنی خێرا، تیشكی بۆ چەند بەتایبەتی پڕۆژەیەكی نیشتەجێبوونیش راكێشاوە.

لە راپۆرتەكە باس لە هاتنی مارکە جیهانییەکان دەکات بۆ شاری هەولێر و ئاماژەی بە چەند ماركەیەكی ناودار كردووە.

• ژیانی کۆمەڵایەتی و میوانداری

* بە گەرمی ستایشی میوانداری و بەخشندەیی خەڵکی ناوچەکەی کردووە، پێشوازییان لە گەشتیاران بە “گەرم و راستەقینە” وەسف کردووە.

* تیشکی خستووەتە سەر ناوچەی عەنکاوە وەک ناوەندێک بۆ ژیانی شەوانە و کات بەسەربردن، کە گەشتیاران دەتوانن چێژ لە موزیكی زیندوو و کەشێکی کۆمەڵایەتی کراوە وەربگرن، لەگەڵ چەند بابەتێكی دیكە.

گۆڤارەكە چییە؟

گۆڤاری “کۆندی ناست تراڤێلەر” (Condé Nast Traveleیەکێکە لە بەناوبانگترین گۆڤارەکانی بواری گەشتوگوزار و شێوازی ژیان (Lifestyle) لە جیهاندا و لە نێو میدیاکانی جیهاندا بە سەرچاوەی هەرە باوەڕپێکراوی گەشتیاری ناودەبرێت و لەلایەن کۆمپانیای میدیایی زەبەلاحی جیهانی Condé Nastـەوە بڵاو دەکرێتەوە و لە ساڵی 1987وە لە ئەمریکا دامەزراوە و تا ئێستا چەندین چاپی هەیە لە وڵاتانی وەک بەریتانیا، ئیسپانیا، ئیتاڵیا، چین و رۆژهەڵاتی ناوەڕاست.

قەڵای هەولێر بەمنزیكانە بەڕووی گەشتیاراندا دەكرێتەوە