دنیادیدەیەکی مەریوان لە فێستیڤاڵی هەنار و پاییزەی هەڵەبجە
گۆرانی دەڵێت و مێخەک دەفرۆشێ
964+
ئەمەل ناجی – هەڵەبجە
دووەم رۆژی فێستیڤاڵی هەنار و پاییزی هەڵەبجەیە و عوسمان مەریوانی دنیادیدەیەکی دەنگ خۆش و قسەخۆشی مەریوانە، هاتووە رەنگێکی کەی بە فێستیڤاڵەکە بەخشیوە و کۆمەڵێک ملوانکە و دەسبەندی مێخەک و پشتوێن و تەسبیحیشی داناوە بۆ فرۆشتن.
جا ئەو هەر بۆ فرۆشتنی ئەو شتانە لێرە نییە، بە دەنگە زوڵاڵەکەی گۆرانی خۆشیش دەچڕێ و پەیامنێری 964 دەڵێت، بووە بە سیمبولێکی دیاری فێستیڤاڵەکە.
عوسمان مەریوانی بۆ 964 وتی، لە مەریوانیش ئیشەکەیان باش دەڕوات، ئەوە چوار ساڵە دێتە فێستڤاڵەکە، بەڵام دەڵێت، “پیاوی ئێستا خێریان نەماوە” و هیچ نە بۆخۆیان و نە بۆ ژنەکانیان ناکڕن.
بەدەم چەپڵەوە گۆرانییەکی خۆشیشی بۆ 964 چڕی و داخیشی بۆ نەمانی رۆژنامەنووس وریا حەمە کەریم هەڵکێشا و وتی، “جەوەکەی فرەتر بەوەوە خۆش بوو”.
پێداچوونەوە: ژێوار خدر
