هەڵمەتی خزمەتگوزاری لە گەڕەكی پەنجاعەلی لە كەركوك
رێگاکانی کۆنکرێت دەکرێن
هەڵمەتی خزمەتگوزاری پەنجا عەلی لە كەركوك بە دەیان كۆڵان دەگرێتەوە
964+
محمد فاتیح
هەڵمەتی خزمەتگوزاری لە گەڕەکی پەنجاعەلی شاری كەركوك، دەستیپێكردووە و ئامانجی سەرەکی ئەم هەڵمەتە، نوێکردنەوە و باشترکردنی ژێرخانی خزمەتگوزاری گەڕەکەکە و دابینکردنی ژینگەیەکی گونجاوتره بۆ دانیشتووانی.
عەدنان رەشید، لێپرسراوی راگەیاندنی شارەوانی کەرکوک بە 964ـی وت:
-لە چوارچێوەی ئەم هەڵمەتەدا، کۆڵان و رێگاکانی گەڕەکەکە، بە شێوەیەکی ستاندارد و بە کوالیتی بەرز کۆنکرێت دەکرێن.
– سیستەمێکی نوێی ئاوەڕۆ دروست دەکرێت، کە بریتییە لە دانانی بۆری ئاوەڕۆی ستاندارد و دروستکردنی کەناڵی تایبەت بۆ کۆکردنەوە و رادەستکردنی ئاوی باران و پاشەڕۆ.
– محەویلە و ستوونی کارەبای نوێ دادەنرێن و ئەم پڕۆژەیە زیاتر لە 30 کۆڵان دەگرێتەوە.
بە گوێرەی قسەكانی عەدنان رەشید، ئەم هەڵمەتى خزمەتگوزارییە، چەندین لایەنی گرنگی هەیە لەوانە، زۆربەی کۆڵانەکانی پەنجاعەلی خۆڵ بوون و لە وەرزی بارانباریندا دەبوونە قوڕولیتە و لە وەرزی هاوینیشدا تۆزێکی زۆریان دروست دەکرد، ئەمەش کاریگەری نەرێنی لەسەر تەندروستی و هاتووچۆی هاوڵاتیيان هەبوو.
-دوای كۆنكرێت كردنی، هاتووچۆ ئاسانتر دەبێت بۆ پیادە و ئۆتۆمبێل.
– رێژەی تۆز و خۆڵ بە شێوەیەکی بەرچاو کەم دەبێتەوە ، کە کاریگەری ئەرێنی لەسەر تەندروستی گشتی دەبێت روخساری گەڕەکەکە جوانتر بێت و بەهای خانووبەرە بەرزتر بێتەوە.
دەشڵێت، نەبوونی سیستەمێکی ئاوەڕۆی گونجاو، یەکێک بوو لە کێشە هەرە گەورەکانی پەنجاعەلی كه لە وەرزی بارانباریندا، ئاوی زۆر لە کۆڵانەکاندا کۆدەبووەوە و دەچووە ناو ماڵەکانەوە، کە جگە لە زیانی مادی، دەبووە هۆی بڵاوبوونەوەی نەخۆشی و پاشەڕۆ.
-کێشەی کۆبوونەوەی ئاو لە کۆڵانەکاندا نامێنێت.
-ژینگەیەکی پاک و تەندروست بۆ دانیشتووان دابین دەكرێت.
-مەترسییەکانی بڵاوبوونەوەی نەخۆشی کەم دەبێتەوە.
وتيشى، دانانی محەویلە و ستوونی کارەبا زۆربەی گەڕەکە کۆنەکان کێشەی سیستەمی کارەبایان هەیە، یان تۆڕی کارەباکەیان کۆنە و بەرگەی پێداویستی ئێستای هاوڵاتيیان ناگرێت، یان ژمارەی محەویلە و ستوونەکانی کارەبا کەمە، ئەمەش دەبێتە هۆی پچڕانی زۆری کارەبا و کەمبوونەوەی ڤۆڵتییە.
-کارەبایەکی جێگیر و بەهێزتر بۆ دانیشتووان دابین دەكرێت.
-کێشەی پچڕانی زۆری کارەبا کەم دەبێتەوە.
-پێداویستییەکانی گەڕەکەکە بۆ کارەبا بە شێوەیەکی باشتر دابین دەكرێت.
