پۆلیس دۆزییەوە و دەستگیری کرد

کەسێکی ئالوودەی ماددەی هۆشبەر ویستی هاوڵاتییەک لە دەربەندیخان بڕفێنێ

2025-09-01 | 10:33

964+

شۆڕش قادری

کەسێکی ئالوودەی ماددەی هۆشبەر ویستی هاوڵاتییەک لە دەربەندیخان بڕفێنی، پۆلیس دۆزییەوە و دەستگیری کرد.

“دوای ئەوەی هاوڵاتییەك سكاڵای تۆماركرد لەدژی كەسێك كە بەوتەی سكاڵاكار دوای كەوتووە و ویستویەتی بیڕفێنێت، مەفرەزەکانی بنكە پۆلیسی دەربەندیخان لێكۆڵینەوە و بەدواداچوونەكانیان دەستپێكرد و دوای وەرگرتنی بڕیاری دادوەر توانرا تۆمەتبار بدۆزرێتەوە و دەستگیر بكرێت”، پۆلیسی سلێمانی لە راگەیەنراوێکدا وادەڵێت.

ئاماژە بەوەشکراوە لە لێكۆلینەوەكاندا دەرکەوتووە کە تۆمەتبار بەكارهێنەری ماددەی هۆشبەر بووە و پێشتریش لەسەر ئەو تاوانە سزا دراوە.

لەئێستادا تۆمەتبار بەناوی ( أ، ح، ح ) بە بڕیاری دادوەر و بەپێی ماددەكانی (432 ، 267 ، ماددەی 30 لەیاسای ماددە هۆشبەرەكان) دەستگیركراوە و لەلایەن بنكەی پۆلیسی دەربەندیخانەوە پەڕاوی لێكۆڵینەوەی بۆ كراوەتەوە .