بەحرکەى هەولێر
دیوار رووخا؛ هاوڵاتییەک گیانى لەدەست دا و یەکێکى تریش بریندارە
964+
عەبدولعەزیز خالند- هەولێر
کەمێک لەمەوبەر، لە گوندێکى سنوورى قەزاى بەحرکە، دیوارێک رووخا، بەهۆیەوە کەسێک گیانى لەدەست دا و یەکێکى تریش بریندار بوو.
رووداوەکە لە گوندى قادراوا کە دەکەوێتە سنوورى بەحرکە، روویداوە.
نەجمەدین مزوری، دانیشتوویەکى گوندەکەیە و زانیارییەکانى بەم شێوەیە بە 964 وت،”دراوسێکەمان سەرقاڵى نۆژەنکردنەوەى خانووەکەى بوو، بەڵام دیوارێک رووخاو و بەهۆیەوە کەسێک گیانى لەدەست دا و کەسێکى تریش بریندار بوو”.
بە وتەى نەجمەدین، ئەوکەسەى گیانى لەدەستداوە، تەمەنى 50 ساڵێک دەبێت و دراوسێیانە و بریندارەکەش دراوسێیەکى تریانە.
لاى خۆیەوە ئارام نەجات، بەڕێوەبەرى پزیشکى دادى هەولێر وێراى پشتڕاستکردنەوەى زانیارییەکان بە 964ـى وت، “تەرمەکە لە پزیشکى دادییە و توێکارى بۆ ئەنجام دەدەن”.
پێداچوونەوە: وریا فەتاح
